Ułady Irana nie dali pajechać na cyrymoniju ŭručeńnia premii Sacharava siamji dziaŭčyny, zabitaj za niapravilnaje našeńnie chidžabu
U piatnicu ŭ tehieranskim aeraporcie imia imama Chamiejni maci, baćku i bratu Machsy Amini paviedamili, što im zabaronieny vyjezd za miažu. U ich zabrali pašparty.
Demanstracyja z partretam Machsy Amini ŭ Paryžy. 16 vieraśnia 2023 hoda. Fota: Ameer Alhalbi/Getty Images
Machsu Amini ŭ vieraśni 2022 hoda zatrymali supracoŭniki palicyi pa abvinavačańni ŭ niapravilnym našeńni chidžabu. Z palicejskaha ŭčastka dziaŭčynu pavieźli ŭ lakarniu, dzie praź niekalki dzion jana pamierła. Svajaki Amini ličać, što pryčynaj jaje śmierci stała źbićcio supracoŭnikami siłavych struktur.
Paśla śmierci dziaŭčyny pa Iranie prakaciłasia chvala pratestaŭ pad łozunham «Žančyny, žyćcio, svaboda».
Premija Sacharava była zaćvierdžana Jeŭraparłamientam u 1988 hodzie i ŭručajecca asobam, jakija «ŭnieśli vyklučny ŭkład u baraćbu za pravy čałavieka pa ŭsim ziamnym šary». Jana nazvana ŭ honar savieckaha pravaabaroncy i dysidenta Andreja Sacharava. Premija ŭručajecca razam z sumaj 50 000 jeŭra.
19 kastryčnika Jeŭraparłamient prysudziŭ premiju Sacharava za svabodu dumki Amini i ruchu «Žančyny, žyćcio, svaboda». Cyrymonija ŭznaharodžańnia zapłanavana na 13 śniežnia ŭ Jeŭrapiejskim parłamiencie ŭ Strasburhu.
Čytajcie taksama:
Pamierła 16-hadovaja iranka, jakaja patrapiła ŭ komu paśla zatrymańnia za adsutnaść chidžaba
Premiju Sacharava prysudzili paśmiarotna Machsie Amini, jakaja stała simvałam pratestaŭ u Iranie
U Iranie palicyja noravaŭ znoŭ źbiła dziaŭčynu za nievykanańnie dres-koda. Jana ŭ komie
