Za vyjezd za miažu daviadziecca płacić bolš, a zabraniravać miesca ŭ čarzie stanie niemahčyma. Mianiajucca praviły pierasiačeńnia miažy na aŭto
16 žniŭnia Łukašenka padpisaŭ ukaz, jaki ŭnosić źmieny ŭ sistemu pracy elektronnaj čarhi na miažy. Jak paviedamlajecca ŭ dakumiencie, źmieny pryniatyja dla pavyšeńnia efiektyŭnaści pracy sistemy elektronnaj čarhi.
Što źmienicca?
Ukazam admianiajecca biaspłatnaje raźmiaščeńnie transpartnych srodkaŭ u zonie čakańnia. Z hetaha vynikaje, što paśla ŭstupleńnia pravak u siłu ŭvieś transpart, jaki pierasiakaje miažu ŭ punktach propusku, abstalavanych sistemaj elektronnaj čarhi, budzie abaviazany płacić 1 bazavuju vieličyniu (32 rubli) za rehistracyju ŭ sistemie elektronnaj čarhi.
Inšaje novaŭviadzieńnie — admiena mahčymaści płatnaha braniravańnia miesca ŭ čarzie. Ujezd u zonu čakańnia budzie ŭparadkavany i stanie rabicca ŭ paradku žyvoj čarhi.
Na hety momant u Biełarusi funkcyjanujuć 11 aŭtadarožnych punktaŭ propusku, na siami ź ich pracuje sistema elektronnaj čarhi.
Pa stanie na viečar 16 žniŭnia na sajcie belarusborder.by pa-raniejšamu možna zabraniravać miesca ŭ čarzie.
U koł-centry servisa paviedamili, što jany pakul sami nie viedajuć, jak budzie adbyvacca praca pa novych praviłach. Pa słovach supracoŭnikaŭ, vyšejšaje kiraŭnictva pakul nie davała jakich-niebudź tłumačeńniaŭ adnosna hetaha.
Za što jašče treba płacić pry pierasiačeńni miažy?
Apłata za rehistracyju ŭ sistemie elektronnaj čarhi — heta nie adzinyja abaviazkovyja vydatki dla aŭtamabilistaŭ, jakija chočuć vyjechać za miažu na ŭłasnym aŭto. Nahadajem, ź leta 2021 hoda biełarusy abaviazanyja apłačvać miascovy zbor za pierasiačeńnie miažy ŭ pamiery adnoj bazavaj vieličyni. Jaho musiać płacić kiroŭcy lehkavych aŭtamabilaŭ i hruzavikoŭ ahulnaj vahoj da 5 ton. Aficyjna srodki źbirajucca na baraćbu z karanavirusnaj infiekcyjaj.
Atrymlivajecca, što padarožniki, jakija pierasiakajuć dziaržaŭnuju miažu na aŭto praz 7 z 11 punktaŭ propusku, ciapier musiać zapłacić dziaržavie 64 rubli.
Čytajcie taksama:
Miljony dalaraŭ štomiesiac. Kolki Biełaruś zarablaje na miažy
