Paratunak dla samotnaha mužčyny
Małaja kotka dla samotnaha mužčyny - heta surjoznaje vyprabavańnie. Jaje isnavańnie buryć prastoru, jakuju ty tak staranna vybudoŭvaŭ štodzień, štomiesiac, a navat štohod. Usio było na svaich miescach, struktura prastory vydavałasia daskanałaj, ruch u joj byŭ pradkazalny, bo ty stvaryŭ ałharytm dziejańniaŭ i zdavałasia ništo nie moža jaho źmianić. Kali rečy znachodziacca doŭhi čas na tych samych miescach, kali kvietki, jakija ty padlivaješ rastuć tak chutka, jak ty ich padlivaješ, a žančyny prychodziać u vyznačany taboj čas, ŭsio heta stvaraje nieparušalnyja i stabilnyja miežy ŭ jakich ty maješ fantastyčnuju nieparaŭnalnuju svabodu, ź jakoj ty ciešyšsia, i časam amal arhastyčna padskokvaješ niby adureły delfin u biruzovych chvalach.
Nierazumnaje kacianio niščyć asabisty perfect world adrazu i ŭščent. Jano ŭryvajecca ŭ tvaju prastoru, nieśviadomaja tvaich unutranych prastoravych zakonaŭ i, takim čynam, znosić pamiežnyja słupki, jakija ty staranna ŭkopvaŭ. Tvaja svaboda źnikaje, bo tabie padajecca, što ŭ adsutnaści miežaŭ kožny ruch moža być razburalny. Sproby zachavać paradak rečaŭ, vynajści novy ałharytm dziejańniaŭ akazvajucca marnymi, bo kotka jašče tolki vypracoŭvaje svoj, a ty zaležyš ad taho jak chutka jana jaho vypracuje i jak doŭha budzie jaho trymacca. Ty ruchaješsia ŭ napramku kropki V, jana - ŭ napramku kropki A. Pierasiačeńnie budzie aznačać kaniec šlachu i dasiahnieńnie novaha sumiesnaha paradku. Paŭstanie ahulnaja pryvatnaja prastora z novymi zakonami. Hałoŭnaje nie spudłavać.
Maja kotka pakul znachodzicca na samym pačatku šlachu. Jana sprabuje nie źviartać uvahi na askiepki majoj byłoj rečaisnaści pad svaimi nahami, tamu davodzicca nahadvać joj pra svaju prysutnaść i nieabchodnaść padtrymańnia kantaktu. My jašče nie vypracavali sumiesnaj damovy, ale rupliva pracujem nad kožnym artykułam. Ja sprabuju zachavać častku taho, što było da jaje, jana buduje całkam novy śviet. Praca nie zaŭsiody daje chutki plon, bo kotka paprostu jašče małaja kab zaŭsiody razumieć što ad jaje patrabujuć, ja ž zanadta stały i daśviedčany kab čakać pakul jana ŭciamić vidavočnaje.
A kali jana navučycca i pastaleje, kali my raśpišamsia pad našym miemarandumam ab mirnym suisnavańni i demarkacyi miežaŭ, tady mahčyma my staniem čakać novaj interviencyi, kab potym raspačać ŭsio nanoŭ. Zakaśniełaja prastora ŭ zamacavanych miežach nasamreč pužaje svajoj pradkazalnaściu, bo nichto nie žadaje bačyć dekaracyi ŭłasnaha skonu i adčuvać jahonuju niepaźbiežnaść. Novaje razbureńnie tvajho status-quo - heta adnačasova pazbaŭleńnie ad jasnaj pradkazalnaj budučyni (budu-čyn-ja), jakaja naležyć tolki tabie i zaležyć ad ciabie i šaniec na niajasnuju pryšłaść, jakaja zaŭsiody tolki cień, bo jaje nadychod niemahčyma pradbačyć. Dziakuj tabie kotka.
