Cyharetnuju kantrabandu ź Biełarusi pierapraŭlali pa Niomanie na płytach pad vyhladam «kryh»
Litoŭskija pamiežniki paviedamili, što za minułyja śviatočnyja vychodnyja jany złavili na Niomanie dzieviać płytoŭ, na jakich pieravozilisia biełaruskija cyharety. Usiaho ŭ ruki supracoŭnikaŭ Dziaržaŭnaj pamiežnaj słužby trapili amal 15 tysiač pačkaŭ cyharet.
Fota: pasienis.lt
Pieršyja try padazronyja abjekty byli zaŭvažanyja ŭ Niomanie ŭ čaćvier ź viertalota pamiežnaj słužby, jaki ablataŭ terytoryju. Litoŭskija pamiežniki, atrymaŭšy sihnał, spuścili na vadu matornuju łodku i vyciahnuli na bierah try płyty. Vyśvietliłasia, što pad polietylenavaj plonkaj na ich byli cyharety biełaruskaj vytvorčaści marak «Fest», NZ Gold i «Minsk». Da ŭsich troch płytoŭ byli prymacavanyja GPS-trekiery, da adnaho — mabilny telefon.
Piać takich ža płytoŭ z cyharetami vyciahnuli ź Niomana pamiežniki kala Druskininkaja ŭ subotu. Choć hetym razam kantrabandysty byli chitrejšyja: jany zasypali fabryčnyja cyharetnyja skrynki brudam, lodam i kavałkami zamierzłaha śniehu, kab heta ŭsio było padobna na zvyčajnyja kryhi. A dziaviaty hruz byŭ zatrymany pozna ŭviečary ŭ niadzielu.
Usiaho za apošnija dni ŭ ruki supracoŭnikaŭ Litoŭskaj pamiežnaj słužby ŭ rajonie Druskininkaja trapili takim čynam 9 samarobnych płytoŭ, na jakich u Litvu płyli 754 upakoŭki cyharet Fest, NZ Gold i «Minsk». Takaja kolkaść cyharet z ulikam usich padatkaŭ kaštuje bolš za 50 tysiač jeŭra.
Miaža Biełarusi ź Litvoj 17 kiłamietraŭ prachodzić pa Niomanie. Kantrabandny hruz zvyčajna spuskajuć u raku ź bieraha ŭ Biełarusi z raźlikam, što račnaja płyń pryniasie jaho na litoŭski bok. A tam užo płyty z cyharetami padbirajuć inšyja ludzi i viazuć ich uhłyb krainy. Adsočvańnie miescaznachodžańnia płytoŭ viadziecca kantrabandystami praz prymacavanyja da ich pryłady GPS.
Litoŭskija mytniki zatrymali hruz kantrabandnych cyharet na 2,7 młn jeŭra
Kantrabandnyja cyharety ź Biełarusi na 1 młn jeŭra vieźli ŭ Litvu ŭ fury z torfam
