Kuryja Minska-Mahiloŭskaj archidyjacezii: arcybiskupa Stanieŭskaha niekarektna nazyvać kiraŭnikom usich biełaruskich katolikaŭ
Papa Francišak pryznačyŭ Juzafa Stanieŭskaha novym arcybiskupam mitrapalitam Minska-Mahiloŭskim. Stanieŭskaha ŭ biełaruskich ŚMI adrazu nazvali kiraŭnikom usich katolikaŭ Biełarusi. Nakolki pravilna tak kazać, catholic.by rastłumačyŭ kancler kuryi Minska-Mahiloŭskaj archidyjacezii, ksiondz kanonik Dźmitryj Puchalski, śpiecyjalist pa kananičnym pravie.
Fota Alaksandry Ščyhlinskaj
«Pieradusim treba dakładna razumieć, što my majem na ŭvazie, užyvajučy termin «novy kiraŭnik», tamu što pa sutnaści kožny biskup u svajoj dyjacezii źjaŭlajecca kiraŭnikom svajho miascovaha Kaścioła (dyjacezii). Novapryznačany arcybiskup mitrapalit Minska-Mahiloŭski Juzaf Stanieŭski z momantu svajho kananičnaha ŭstupleńnia na pasadu ŭznačalić Minska-Mahiloŭskuju archidyjaceziju i stanie na čale Minska-Mahiloŭskaj Mitrapolii, u jakuju ŭvachodziać čatyry biełaruskija dyjacezii [Minska-Mahiloŭskaja archidyjacezija, a taksama Hrodzienskaja, Pinskaja, jakaja achoplivaje Bresckuju i Homielskuju vobłaści, i Viciebskaja dyjacezii. — NN].
Ale razam z tym jon nie budzie kiraŭnikom usich hetych dyjacezij, bo ŭ kožnaj ź ich jość svoj ułasny kiraŭnik — dyjacezijalny biskup, pryznačany Papam», — tłumačyć D. Puchalski.
«Paŭnamoctvy Mitrapalita ŭ adnosinach da inšych dyjacezij, akramia Minska-Mahiloŭskaj archidyjacezii, minimalnyja, tamu bolš pravilna kazać, što Mitrapalit uznačalvaje Minska-Mahiloŭskuju Mitrapoliju, ale pry hetym nie kiruje ŭsimi katolikami Biełarusi. U adroźnieńnie ad pravasłaŭnaha Mitrapalita, jon sam nie pryznačaje novych biskupaŭ i nie zvalniaje ich z pasady. U Katalickim Kaściole heta vyklučnaja prerahatyva biskupa Ryma — Papy.
Takim čynam, my bačym, što ŭžyvańnie terminu «kiraŭnik Kaścioła ŭ Biełarusi», abo «hałava biełaruskich katolikaŭ» u pryncypie nie źjaŭlajecca karektnym.