Кінафестываль «Паўночнае ззянне» прапануе дасылаць свае фільмы для ўдзелу
Кінафестываль «Паўночнае ззянне» зноў шукае фільмы беларускіх кінатворцаў, каб паказаць іх міжнародным і беларускім гледачам.
Стужкі, пададзеныя на Open Call, могуць стаць часткай Беларускага конкурсу 10-га кінафэсту. Фільмы Беларускага конкурсу будзе ацэньваць міжнароднае журы і выбера пераможцу, кажуць арганізатары.
Сёлета арганізатары кінафэсту шукаюць фільмы, зробленыя беларусамі і беларускамі ў 2023-2024 гадах у любой краіне, у любым жанры і любога хронаметражу. Дакументальныя, ігравыя, гібрыдныя, анімацыйныя, кароткаметражныя ці поўнаметражныя — усе фільмы будуць разгледжаныя адборшчыкам Беларускага конкурсу для ўдзелу ў кінафестывалі «Паўночнае ззянне».
Юбілейны фэст «Паўночнае ззянне» пройдзе з 4 па 21 лістапада. Каб прапанаваць свой фільм для ўдзелу, трэба запоўніць невялікую форму да 1 жніўня. Калі ў вас узнікнуць пытанні, пішыце ў сацыяльныя сеткі праекта Instagram, Telegram, FB ці на пошту [email protected].
Арганізацыя і правядзенне кінафестывалю — справа затратная: трэба зрабіць беларускія субтытры да фільмаў, аплаціць ліцэнзію на online-стрымінг, аплаціць правы на самі фільмы, а таксама працу каманды.
Добрая навіна ў тым, што вы можаце дапамагчы: данат у любым памеры паспрыяе таму, каб фэст прайшоў яскрава і маштабна.
