У рэгіёнах у маі зладзяць Дні цвярозасці. А каму ў гэтыя дні можна будзе купіць алкаголь?
Прадаваць спіртное забароняць не толькі ў дзень апошняга званка.
Беларускія рэгіёны ўстанаўліваюць дні цвярозасці ў маі. У гэтыя дні алкаголь не будуць прадаваць у крамах. Аднак ёсць выключэнні з правілаў, піша Telegraf.
Традыцыйна забарона на продаж алкаголю па ўсёй краіне ўводзіцца ў дзень апошняга званка ў школах і ў дзень выпускных вечароў — сёлета ён трапляе на 14 чэрвеня. У гэты дзень забарона на продаж алкаголю ўводзіцца на суткі з 8 гадзін раніцы.
Пры гэтым чыноўнікі ў рэгіёнах могуць вызначаць дадатковыя дні цвярозасці. Так, у Мінскім раёне ён пройдзе 25 мая — «у сувязі з правядзеннем мерапрыемстваў, накіраваных на прапаганду (папулярызацыю) здаровага ладу жыцця, прафілактыку п'янства і алкагалізму, барацьбу з імі».
Дзень цвярозасці ў Пружанскім раёне прызначаны на 15 мая (з 8 да 17), у Бабруйску — на 17-е (з 0 да 24), у Касцюковіцкім раёне — на 24-е (з 0 да 24), у Крупскім і Глускім раёнах — на 31 мая (з 0 да 24).
У рашэннях выканкамаў звычайна агаворваецца, што забарона не распаўсюджваецца на ўстановы грамадскага харчавання, дзе алкаголь прадаюць на разліў.
Акрамя таго, абмежаванні на продаж алкаголю не распаўсюджваюцца на рознічныя гандлёвыя аб'екты, калі гаворка ідзе аб правядзенні рытуальных абрадаў і вяселляў. Прынамсі такую агаворку зрабілі чыноўнікі ў Пружанскім раёне.
Чытайце таксама:
Беларусы сталі піць менш гарэлкі
Вікторыя Азаранка: Я ўжо 8 гадоў не п'ю алкаголю
У Брэсцкай вобласці ў мужчыны знайшлі 300 літраў спірту
Жыхар Мазыра выклікаў міліцыю на суседку, а ў выніку страціў 300 літраў брагі і трапіў на штраф
