Улады акупаванай часткі Запарожскай вобласці падпісалі распараджэнне аб правядзенні рэферэндуму
У панядзелак Яўген Баліцкі, кіраўнік адміністрацыі Запарожскай вобласці, усталяванай расійскай арміяй на захопленых тэрыторыях, падпісаў распараджэнне аб падрыхтоўцы да рэферэндуму аб «ўз'яднанні з Расіяй», паведамляе Бі-бі-сі.
Яўген Баліцкі
Мяркуючы па словах іншага прадстаўніка акупацыйнай улады, пытанне ўжо вырашана.
«Запарожская зямля назаўжды сыходзіць са складу Украіны. Запарожская вобласць узяла курс на ўз'яднанне з Расіяй і зваротнага шляху не будзе», — казаў раней Уладзімір Рогаў, які мае ў гэтай адміністрацыі пазіцыю галоўнага члена савета.
Падрыхтоўка да рэферэндуму даўно ідзе на акупаванай расійскімі войскамі часткі вобласці, у якую не ўваходзіць абласны цэнтр — горад Запарожжа.
23 ліпеня там пачалі фармаваць выбарчую камісію для правядзення гэтага рэферэндуму. Для гэтага акупацыйныя ўлады збіраюцца папрасіць дапамогі ў Цэнтрвыбаркама РФ.
Сам рэферэндум павінен прайсці восенню, але канкрэтная дата не называлася.
Прэзідэнт Украіны Уладзімір Зяленскі заявіў, што падобныя рэферэндумы будуць азначаць канец любых перамоваў з Расіяй.