Белы дом пакуль не прыняў рашэнне аб санкцыях супраць Пуціна з-за «тэхнічных складанасцяў»
Адміністрацыя прэзідэнта ЗША Джо Байдэна пакуль не вырашыла, ці ўводзіць санкцыі супраць Уладзіміра Пуціна, паведамляе тэлеканал CBS, спасылаючыся на свае крыніцы.
«ЗША маглі б увесці санкцыі супраць Пуціна, але да гэтага моманту Белы дом не прыняў такога рашэння», — распавяла ў эфіры карэспандэнт тэлеканала Маргарэт Брэнан.
Яна спаслалася на крыніцы, паводле якіх, калі ўвесці такія санкцыі, то паўстануць «некаторыя тэхнічныя складанасці».
«Калі ўвесці санкцыі супраць кагосьці, з кім трэба весці перамовы, як яны будуць падарожнічаць? Гэта таксама будзе цяжка з пункту гледжання каардынацыі», — сказала журналістка.
Яна адзначыла, што «больш эфектыўным» будзе «ціск на алігархаў, блізкіх да Пуціна, іх бізнэс-структуры і банкаўскія рахункі», каб гэтыя бізнэсоўцы ўплывалі на прэзідэнта Расіі.
