BioNTech і Pfizer пачалі выпуск вакцыны ад амікрона
Па словах сузаснавальніка BioNTech, пастаўкі на рынак вакцыны ад амікрон-варыянта каранавіруса могуць пачацца да сакавіка. Аднак еўрапейскі рэгулятар пакуль не казаў, ці лічыць выпуск такой вакцыны мэтазгодным.
Германская фармацэўтычная кампанія BioNTech і яе амерыканскі бізнес-партнёр Pfizer пачалі вытворчасць вакцыны супраць амікрон-варыянта каранавіруса для яе наступнага камерцыйнага выкарыстання. Пра гэта паведаміў сузаснавальнік германскай кампаніі Угур Шахін у аўторак на канферэнцыі па ахове здароўя, піша Deutsche Welle.
«Мы зыходзім з таго, што будзем гатовыя пачаць пастаўкі прадукцыі на рынак да сакавіка — як толькі будуць атрыманыя дазволы рэгулятараў», — заявіў Шахін, дадаўшы, што клінічныя выпрабаванні павінны пачацца ў канцы студзеня.
Еўрапейскае агенцтва па лекавых сродках (EMA) пакуль не казала, ці лічыць яно выпуск такой вакцыны мэтазгодным.
Генеральны дырэктар Pfizer Альберт Бурла 10 студзеня паведаміў у эфіры амерыканскага тэлеканала CNBC, што кампанія прыступіла да выпуску на свой страх і рызыку. Бурла прызнаўся, што пакуль не ведае, ці спатрэбіцца прэпарат і як ён будзе выкарыстоўвацца. «Аднак мы будзем гатовыя», — указаў ён.
У Biontech і Pfizer мяркуюць, што ў 2022 годзе іх вытворчыя магутнасці складуць да чатырох мільярдаў доз вакцыны па ўсім свеце.