Суд над Сцяпанам Латыпавым сёння не адбыўся: яго не прывезлі ў суд па стане здароўя
У судзе Савецкага раёна сёння меўся працягнуцца суд над палітвязнем Сцяпанам Латыпавым, якога ўчора ў судзе дактары хуткай дапамогі накіравалі на дадатковае абследаванне. Але ў суд Сцяпана канваіры не даставілі.
Затрыманне Сцяпана Латыпава ў верасні 2020 года. Zerkalo.io
Суддзя Аляксандр Воўк заявіў, што на працэс Латыпава не даставілі праз стан здароўя, аб чым маецца адпаведная даведка. Суд працягнецца 2 жніўня.
Нагадаем, учора ў судзе абвясцілі перапынак для выкліку хуткай дапамогі, бо Сцяпан «працягла адчуваў сябе дрэнна».
Перад судом ён казаў, што раніцай у яго быў ціск быў 160 на 90. Сцяпан растлумачыў, што ў яго галавакружэнне і ён з цяжкасцю сочыць за працэсам.
Як стала вядома, у сувязі з дрэнным самаадчуваннем дактары накіравалі Сцяпана Латыпава на дадатковае абследаванне.
Сам палітвязень цяпер у СІЗА-1 на Валадарскага.
