Krainy ES nacyjanalizujuć struktury «Hazprama»
Adrazu dźvie krainy ES abjavili pra nacyjanalizacyju struktur, raniej padkantrolnych rasijskamu «Hazpramu», piša «Radyjo Svaboda».
U paniadziełak ministr raźvićcia i technałohij Polščy Valdemar Buda apublikavaŭ rašeńnie, pavodle jakoha Polšča zabiraje «hazpramaŭskuju» dolu ŭ kampanii EuRoPol Gaz, jakaja kiruje polskim učastkam sietki hazapravodaŭ «Jamał — Jeŭropa».
Pavodle rašeńnia Budy, nad dolami «Hazprama» budzie pastaŭlena časovaja prymusovaja administracyja. Heta nieabchodna, pakolki sam «Hazpram» pad sankcyjami ES i nie moža ŭ poŭnaj miery adkazvać za bieśpierabojnaje funkcyjanavańnie krytyčna važnaj infrastruktury.
U toj ža dzień Niamieččyna, jak paviedamlaje Financial Times, abviaściła ab nacyjanalizacyi miascovaj daččynaj kampanii rasijskaha hazavaha kancerna — kampanii Gazprom Germania. Jana budzie pierajmienavanaja ŭ Securing Energy for Europe GmbH (SEFE). Jak ličać niamieckija ŭłady, nacyjanalizacyja nieabchodnaja dla zachavańnia enierhietyčnaj biaśpieki krainy: ad SEFE ŭskosna zaležyć najbujniejšaje ŭ Niamieččynie hazaschovišča ŭ kamunie Reden u Nižniaj Saksonii. 12 listapada Jeŭrakamisija vyłučyła na raźviazvańnie hetaj prablemy 225,6 młn jeŭra.
Paśla pačatku vajny Niamieččyna abjaviła ab płanach pastupova admovicca ad rasijskich enierhanośbitaŭ. Raniej z Rasii impartavali 40% usiaho pryrodnaha hazu, jaki vykarystoŭvajecca ŭ krainie. Ciapier hety pakazčyk upaŭ da 7%.