Žodzinski milicyjant, jaki ŭdaryŭ žančynu na prateście ŭ 2020 hodzie, adsudziŭ u čerykaŭskaha taksista 1000 rubloŭ
U takuju sumu major milicyi z Žodzina Mikałaj Baranoŭski acaniŭ svaje maralnyja pakuty ad kamientara žychara Čerykava Dźmitryja Ivanova. Jaho rajonny sud pryznaŭ vinavatym u abrazie słužbovaj asoby i pakaraŭ na 1,5 hada «chatniaj chimii». Na pracesie źniavoleny nie moh siadzieć praz boli ŭ nyrkach. U dzień ahučvańnia vyraku ŭ Ivanova naradziŭsia syn.
Fota: z sacyjalnych sietak. Dźmitryj Ivanoŭ
Čerykaŭ — haradok na samym uschodzie krainy. U 2020 hodzie tam taksama aktyŭna pratestavali ludzi. Dźmitryj Ivanoŭ, pradprymalnik i taksist, byŭ adnym z takich. Niekalki razoŭ jaho zatrymlivali, štrafavali, kidali «na sutki». Sioleta 22 vieraśnia jon byŭ schopleny amapaŭcami na adnoj z aŭtamabilnych stajanak u rajcentry.
Paśla zatrymańnia taksista zavieźli za try sotni kiłamietraŭ u Žodzina, a adtul na sud dastavili znoŭ u Čerykaŭ.
Pakryŭdžany im milicyjant Mikałaj Baranoŭski prasłaviŭsia tym, što ŭdaryŭ žančynu na prateście ŭ vieraśni 2020 hoda. Jana padała zajavu ŭ Śledčy kamitet pa fakcie prymianieńnia siły supracoŭnikam milicyi.
Incydent skončyŭsia apraŭdańniem milicyjanta, u dziejańniach jakoha śledčyja nie ŭhledzieli prykmietaŭ «pieravyšeńnia ŭłady ci słužbovych paŭnamoctvaŭ», a hvałt u adnosinach da žančyny byŭ rascenieny, jak pavodziny «va ŭmovach abhruntavanaj prafiesijnaj ryzyki abo krajniaj nieabchodnaści».
1 listapada Baranoŭski adsudziŭ 1000 rubloŭ maralnaj škody ŭ Dźmitryja Ivanova. Milicyjant paličyŭ siabie abražanym jaho kamientarom u sacyjalnych sietkach.
Jak stała viadoma «Našaj Nivie», na sudovym pracesie Ivanoŭ nie moh siadzieć, patłumačyŭšy, što ŭ jaho balać nyrki.
Na pracesie Dźmitryj Ivanoŭ całkam pryznaŭ vinu i vybačyŭsia pierad milicyjantam. Kampiensacyju maralnaj škody apłaciŭ jamu da suda.
Vyrak pradprymalniku sudździa Alena Cyrkunova ahučyła 1 listapada. Jamu prysudzili 1,5 hady abmiežavańnia voli biez nakiravańnia va ŭstanovu adkrytaha typu. Prakuror prasiŭ sud pakarać abvinavačanaha dvuma hadami pazbaŭleńnia voli.
Pradprymalnika vyzvalili z-pad varty ŭ zali suda. 1 listapada, jak paviedamiła sudździa, u Ivanova naradziŭsia syn.