«Vierch cynizmu». Jak va Ukrainie kamientujuć vinšavańnie Łukašenki
Alaksandr Łukašenka pavinšavaŭ narod Ukrainy z Dniom Niezaležnaści. Dapamohu biełaruskich uładaŭ rasijskaj ahresii jon nazvaŭ «siońniašnimi supiarečnaściami», paabiacaŭ, što «Biełaruś i nadalej praciahnie vystupać za zachavańnie zhody, raźvićcio družalubnych uzajemapavažlivych kantaktaŭ», pažadaŭ ukraincam «mirnaha nieba, talerantnaści, mužnaści, siły i pośpiechaŭ u adnaŭleńni hodnaha žyćcia». «Naša Niva» pahladzieła, jak va Ukrainie adreahavali na vinšavańnie. Praz bahaćcie abrazaŭ niekatoryja paviedamleńni pryvodziacca z karekturaj.
Telehram-kanał Antona Hieraščanki
«Navina, jakuju składana kamientavać. Dyktatar, mabyć, adčuvaje, što pieramoha Ukrainy blizka. Ale ŭkraincy nie zabuduć, što jon rabiŭ. I paśla danataŭ dla USU, ništo nie pieraškadžaje zrabić z pałka Kalinoŭskaha surjoznuju siłu dla vyzvaleńnia Biełarusi!»
Telehram-kanał RESSENTIMENT
«Faktyčny kiraŭnik dziaržavy, z terytoryi jakoj idzie rehularny abstreł ukrainskich haradoŭ, pažadaŭ ukraincam «mirnaha nieba», a taksama «talerantnaści, mužnaści, siły i pośpiechaŭ u adnaŭleńni hodnaha žyćcia».
Adreahavali i ŚMI.
«Łukašenka nie pasaromieŭsia pažadać ukraincam mirnaha nieba i talerantnaści», — z takim zahałoŭkam apublikavała navinu pra vinšavańnie «Ukrainskaja praŭda».
«Samaabvieščany prezident Biełarusi Alaksandr Łukašenka, jaki pradastaviŭ terytoryju svajoj krainy dla nastupu Rasii na Ukrainu i staŭ saŭdzielnikam Uładzimira Pucina ŭ vajnie, pavinšavaŭ narod Ukrainy z Dniom niezaležnaści», — napisała vydańnie.
«Samaabvieščany prezident Biełarusi Alaksandr Łukašenka i saŭdzielnik vajennych złačynstvaŭ Rasii na ŭkrainskaj ziamli pavinšavaŭ Ukrainu z Dniom niezaležnaści», — piša «Unian».
Vydańnie nahadvaje, što ź Biełarusi pa Ukrainie była zapuščanaja minimum 631 rakieta, pryčym apošni raz danyja abnaŭlalisia ŭ mai. «Najbolšaj bambardziroŭcy ź Biełarusi Ukraina padvierhnułasia 1 krasavika, u toj dzień rakiety zapuskali ŭ pramym sensie kožnyja 10 chvilin, usiaho — kala 56 bojehałovak, jakija prykryvali adstupleńnie rasijskich akupantaŭ z terytoryi Ukrainy. Zapuski ź Biełarusi praciahvajucca i dahetul».
«Ci jość miaža cynizmu: samaabvieščany prezident Biełarusi Alaksandr Łukašenka, jaki dazvoliŭ Pucinu bambić Ukrainu sa svajoj terytoryi, pavinšavaŭ z Dniom niezaležnaści. Dyktatar pažadaŭ «mirnaha nieba», a taksama «mužnaści, siły i pośpiechaŭ u adnaŭleńni hodnaha žyćcia». Vinšavańni 24 žniŭnia apublikavali na sajcie Łukašenki», — napisała TSN u telehramie.
«Miarkuju, što spadar Łukašenka surjozna ličyć, što śviet nie fiksuje saŭdziełu jaho palityčnaj hrupy ŭ naŭmysnych złačynstvach suprać Ukrainy. I tamu praciahvaje ładzić publičnuju kłaŭnadu. Učora aktyŭna raspaviadaŭ, što za try-čatyry dni ŭsio skončycca i niepasłuchmianych ukraincaŭ vyražuć, a siońnia, u lepšych tradycyjach cynikaŭ, žadaje Ukrainie «mirnaha nieba», adpraŭlajučy z ułasnych aeradromaŭ tony śmiarotnych snaradaŭ dla napadu na mirnyja ŭkrainskija harady », — tak daradca kiraŭnika Ofisa prezidenta Ukrainy Michaił Padalak prakamientavaŭ vinšavańnie «Zierkału».
«Razumieju, što kamuści zdajecca, što možna pažyćciova biazbožna chłusić ci rabić vyhlad, što ŭsio heta božaja rasa ŭ vočy. Ale jurydyčna ŭsio, što robić spadar Łukašenka, absalutna dakładna i kankretna prapisana kryvioj ukraincaŭ. Tamu prosta nieabchodna dačakacca pravilnaha finału vajny, krachu rasijskaj kryvavaj impieryi, kab detalova abmierkavać usie aśpiekty adcieńniaŭ «mirnaha nieba nad Ukrainaj» z pradstaŭnikami ciapierašniaj biełaruskaj administracyi…», — dadaŭ jon.
