U Salihorsku adpačyvalniki vycisnuli vartaŭniku vočy
Trahičnaje zdareńnie adbyłosia jašče 2 lipienia ŭ zonie adpačynku «Cichaja zatoka» ŭ Salihorsku. Adpačyvalniki ci to vykałali, to vycisnuli vočy vartaŭniku-piensijanieru Juryju Chrałoviču. Adno voka daktaram udałosia «sabrać pa kavałačkach», i ciapier jość šaniec adnavić na im častku zroku, ale patrebnyja hrošy, paviedamlaje miascovaje vydańnie «Šachcior».
Pra vypadak raskazała žonka paciarpiełaha Natalla Chrałovič. Jaje muž, były budaŭnik, pracavaŭ vartaŭnikom u zonie adpačynku «Cichaja zatoka» ŭ lesaparku ŭ Salihorsku.
U kiraŭnictva zony adpačynku Juryj Chrałovič charaktaryzujecca jak sumlenny i vykanaŭčy supracoŭnik. Ale ŭviečary 2 lipienia ŭ jaho ŭźnik kanflikt z adpačyvalnikami. U vyniku mužčynu nanieśli ciažkija cialesnyja paškodžańni, i jon całkam straciŭ zrok.
Paśla napadu Juryj Uładzimiravič pračnuŭsia ad daždžu. Uśviadomiŭ, što ničoha nie bačyć, a z vačej idzie kroŭ. Pačaŭ abmacvać miascovaść rukami. Zrazumieŭ, što vakoł les, ale iści nie moh.
Dapamahli sabaki, jakija achoŭvali terytoryju zony adpačynku: jon pačaŭ klikać ich pa mianuškach, a jany brachać. Tak, aryjentujučysia na brech, jon zmoh dapaŭźci da vartoŭni. Na ranicu pryjechała žonka, jakaja nie mahła ŭsiu noč datelefanavacca da muža.
Dalej usio jak u tumanie: chutkaja, składanaja apieracyja praciahłaściu ŭ 6 hadzin. U apieracyjnaj zmahalisia za zrok pacyjenta, a Natalla ŭvieś hety čas znachodziłasia ŭ balničnym kalidory, molačysia za muža ŭ pakutlivym čakańni. Doktar, jaki rabiŭ apieracyju, skazaŭ: «Adno voka vyciekła całkam, a voś druhoje źbirali pa kavałačkach. I što heta za katy, tak paździekavalisia z čałavieka?». Na siońniašni dzień na hetyja pytańni złamyśnik adkaža ŭ Śledčym kamitecie i paniasie pakarańnie. Adnak zrok całkam adnavić užo niemahčyma.
Juryj Chrałovič, daznaŭšysia, što stanie całkam nieviduščym, trapiŭ u hłybokuju depresiju i pierastaŭ razmaŭlać z navakolnymi. Jon nie choča stać kłopatam dla svajoj siamji i być im ciažaram. Adnak šaniec častkova adnavić zrok na adnym voku jość. Ale dziela hetaha patrebnaja darahaja dyjahnostyka i reabilitacyja. Siamja ŭžo prahladaje miedycynskija centry pa adnaŭleńni zroku, ale srodkaŭ ź siamiejnaha biudžetu nie chopić.
Dapamahčy i padtrymać siamju možna, papoŭniŭšy bałans karty 6711 2900 4280 6301 BELARUSBANK, termin dziejańnia 07/24 na imia Yuri Hralovich.
