«My budziem ździŭlać». Ministr pramysłovaści raskazaŭ pra płany pradpryjemstvaŭ pa pieraadoleńni sankcyj
Ab hetym paviedamiŭ žurnalistam ministr pramysłovaści Piatro Parchomčyk paśla dakłada Łukašenku, piša BiełTA.
«Tak, niepryjemna ŭsio toje, što robiać jeŭrapiejskija krainy ŭ častcy našych pramysłovych pradpryjemstvaŭ. Ale heta jakraz šturšok i mahčymaść našym pradpryjemstvam pahladzieć na pytańni impartazamiaščeńnia, techničnych rašeńniaŭ. Inakš kažučy, znajści zamienu kamplektujučych ad tych, chto kinuŭ nam peŭny vyklik.
I siońnia našy kanstruktarskija škoły vyrašajuć takija zadačy. Nie chaciełasia b raskryvać ciapier našy techničnyja płany, ale my budziem ździŭlać — i vas, i hramadskaść», — skazaŭ ministr.
«Niama nijakaha sumnieńnia, što z hetymi sankcyjami pramysłovyja pradpryjemstvy Biełarusi spraviacca», — pierakanany jon.
Situacyju ŭ cełym u pramysłovaści ministr acharaktaryzavaŭ jak kirujemuju. Pavodle słoŭ Piatra Parchomčyka, za 9 miesiacaŭ hoda pradpryjemstvy haliny vykanali ŭsie pakazčyki, pry hetym demanstrujučy vielmi vysokija tempy rostu ekspartu pradukcyi — amal 139 pracentaŭ.
«Prezidentam było dadziena daručeńnie: niahledziačy na ŭsie składanaści biahučaha momantu, zachavać abjomy vytvorčaści, ekspartu na ŭzroŭni taho, što dasiahnuta pa vynikach 6 miesiacaŭ. Heta značyć my faktyčna za druhoje paŭhodździe pavinny padvoić vyniki pramysłovych pradpryjemstvaŭ Biełarusi. U nas niama nijakich sumnieńniaŭ, što my z pastaŭlenaj zadačaj spravimsia», - ličyć kiraŭnik Minprama.
Jon padkreśliŭ, što abstanoŭka na pradpryjemstvach dziełavaja, jany pracujuć u štatnym režymie. A źviestki ab niejkich zabastoŭkach, pavodle jaho słoŭ, jość tolki ŭ asobnych Telegram-kanałach.
Siaredniaja zarpłata pa Minpramie vahajecca ad 1350 do 1400 rubloŭ. «Da kanca hoda jana budzie ŭ miežach 1400-1450, inakš kažučy, niaznačna pryraście», — adznačyŭ Piatro Parchomčyk. Važnymi faktarami dla rabotnikaŭ, akramia pamieraŭ zarpłaty, ministr ličyć svoječasovaść jaje vypłaty, važki sacyjalny pakiet.
«Dumaju, što hetamu pakietu mohuć pazajzdrościć lubyja subjekty haspadarańnia — i rasijskija, i inšyja zamiežnyja… Tamu što vielmi vialikaja idzie dapamoha ŭ roznych napramkach. Heta i dla moładzi, jakaja moža atrymać srodki dla budaŭnictva kvatery. Heta i ŭ halinie azdaraŭleńnia. I plus jašče šerah pytańniaŭ, źviazanych z padrychtoŭkaj, navučańniem. Heta ŭsio robicca za košt pradpryjemstvaŭ», — źviarnuŭ uvahu kiraŭnik Minprama.
