Vachciorku internata asudzili na 1,5 hoda chimii za abrazu siaržanta milicyi
Adbyŭsia razhlad jašče adnoj kryminalnaj spravy za publičnuju abrazu pradstaŭnika ŭłady (art. 369 KK). Hetym razam na łavie padsudnych apynułasia 51-hadovaja Viera Strunina, jakaja pracuje vachciorkaj u viciebskim internacie — jana raźmiaściła karotki kamientar na adras viciebskaha milicyjanta Vitala Šniavina, jaki ŭžo zvolniŭsia ź milicyi, paviedamlajuć pravaabaroncy.
Kamientar byŭ pakinuty pad fotazdymkam, na jakim milicyjant raspylvaje haz na hramadzian. Hety zapis i niehatyŭnyja kamientary pad im ubačyła 34-hadovaja chatniaja haspadynia Natalla Sielukova — jana i źviarnułasia ŭ milicyju z prośbaj dać im pravavuju acenku.
Sudździa Dzianis Alaksiejenka pryznaŭ žančynu vinavataj i pastanaviŭ pakarać jaje abmiežavańniem voli na 1 hod i 6 miesiacaŭ z adbyvańniem terminu ŭ papraŭčaj ustanovie adkrytaha typu. Taksama Viera Strunina musić vypłacić paciarpiełamu 500 rubloŭ kampiensacyi. Mabilny telefon «Samsunh», za jaki jašče nie vypłačanaja rasterminoŭka, kanfiskavany.
