Navukoŭcy zrabili kardyjastymulatar, jaki moža rastvaracca ŭ ciele
Technałohija moža dapamahčy tym pacyjentam, jakim nie treba pastajannaja dapamoha ŭ rehulavańni pracy serca.
Pieršy ŭ śviecie kardyjastymulatar byŭ impłantavany pacyjentu ŭ 1958 hodzie, i z taho času miljony ludziej atrymali dapamohu ad hetych miechanizmaŭ. Ale nie ŭsim pacyjentam treba pastajanna karystacca kardyjastymulataram. Niekatorym patrebnaja dapamoha miechanizma tolki na praciahu niekalkich dzion ci tydniaŭ — naprykład, paśla apieracyi na adkrytym sercy.
U naš čas užo isnujuć kardyjastymulatary, jakija možna vykarystoŭvać časova, ale ich praca niedaskanałaja. Razam z elemientami stymulatara ŭ arhanizm možna zanieści infiekcyju, a źniešnija sistemy miechanizma mohuć vypadkova źmiaścicca. Kali ž stymulatar buduć prybirać, heta moža paškodzić sardečnuju tkanku, piša Guardian.
Ciapier, jak śćviardžajuć daśledčyki, jany stvaryli biezakumulatarny kardyjastymulatar, jaki možna impłantavać prosta na pavierchniu serca. Kali ž arhanizmu bolš nie budzie patrebnaja dapamoha miechanizma, cieła moža prosta jaho pierapracavać. Stymulatar kaštuje prykładna 100 dalaraŭ, jon pracuje biez pravadoŭ, jaho možna prahramiravać i kantralavać zvonku cieła.
Revalucyjny kardyjastymulatar prydumali navukoŭcy z Paŭnočna-Zachodniaha ŭniviersiteta ŭ amierykanskim štacie Ilinojs. Jany stvaryli hety hibki devajs, jaki važyć mienš za paŭhrama, z materyjałaŭ nakštałt mahniju, valframu, kremniju i palimieru pad nazvaj PŁHA. Usie jany sumiaščalnyja z tkankami cieła, ale pry hetym prymajuć udzieł u chimičnych reakcyjach, jakija dazvalajuć hetym materyjałam ź ciaham času rastvaracca i pahłynacca ciełam.
Kardyjastymulatar zabiaśpiečvajecca enierhijaj z dapamohaj biespravadnoj technałohii. Voś jak heta pracuje: enierhija na vysokaj častacie adsyłajecca na pryjomny elemient unutry stymulatara. Tam jana kanviertujecca ŭ elektryčny tok, jaki vykarystoŭvajecca, kab rehulavać pracu serca. Padobnaja technałohija ŭžo isnuje — takim čynam, naprykład, adbyvajecca biespravadnaja zaradka smartfonaŭ i elektryčnych zubnych ščotak.
