U Višnievie piaty hod restaŭrujuć kaścioł Najśviaciejšaj Panny Maryi
Śviatyniu davodziać da ładu z 2010 hoda.
Draŭlany chram u Višnievie paŭstaŭ u 1424 hodzie. U 1641 hodzie na jaho miescy pabudavali muravany kaścioł. Adnoŭleny ŭ 1771 hodzie paśla pažaru.
Mienavita ŭ hetym kaściole šmat hadoŭ słužyŭ ksiondz Uładzisłaŭ Čarniaŭski, jaki biełarusizavaŭ kaścioł. Pierakładaŭ na biełaruskuju Bibliju. Śviatar tut i pachavany, pobač sa śviatyniaj.
Mahiła ajca Čarniaŭskaha kala kaścioła.
«Byŭ u strašennym zaniapadzie kaścioł. I my jaho chočam pryvieści ŭ daskanały stan. Za hety čas zrabili šmat, — raskazvaje ksiondz Juzaf. — U bakavoj kaplicy zrabili ałtary Śviatomu Juzafu, Maci Božaj Astrabramskaj — jon byŭ uvohule vydrany, aksamit byŭ vyćviły, ćvil źjaviłasia. Viadziecca praca pa pierakryćci kaścielnaj zvanicy ŭ viežy — jana praciakaje. Majem namier i druhuju pierakryć».
Patrabuje restaŭracyi i kaścielny arhan. Jon byŭ zrobleny majstram Fłaryjanam Astramieckim u pačatku XX st.
«Kab italjancy znajšli skrypku Stradyvary ci francuzy novaje pałatno Hahiena, ci nie ŭzialisia b jany ich restaŭravać? Uzialisia b, kaniečnie. I luby muziej schapiŭsia b za takuju inicyjatyvu, kab u hetym paŭdzielničać. A tut instrumient Astramieckaha, jaki taksama pa-svojmu ŭnikalny. Hahien ža taksama žyŭ nie ŭ XVI stahodździ, a jaho pałotny darahija i modnyja. Ministr kultury admoviŭ u dapamozie. Mo jaki sponsar znojdziecca? Možna dapamahčy hetamu arhanu zapracavać», — adznačaje ksiondz Juzaf.
Usie raboty viaducca za košt miascovych achviaradaŭcaŭ.
«Achviaru robiać ludzi. A chto ž nam dapamoža? U nas nie było ni adnaho ni palaka, ni francuza, ni amierykanca jak sponsara ci miecenata».
U 1414 hodzie źjaviłasia adnamu čałavieku tut Panna Maryja i skazała pabudavać chram. I źjaviłasia z taho času tut krynička.
