Ofis IT-kampanii pa-biełarusku: sučasnaść, kamfort i rodnaja mova
15 maja 2015 hoda adbyłosia adkryćcio novaha ofisa kampanii «Sistemnyja technałohii». Ofis atrymaŭsia dosyć niezvyčajny. Viadoma ž, u im jość i zvykłyja stały, i kresły, prahramisty nie tulacca ŭ kapsułach i nie zahružanyja ŭ matrycu, adnak užo ź pieršych krokaŭ i supracoŭniki, i naviedvalniki traplajuć u zachaplalny śviet biełaruskaj kultury.
Na resepšen nas sustrakaje vialikaja hlancavaja šylda «Sistemnyja technałohii». I na hetym urok biełaruskaj movy tolki pačynajecca. Tvorčuju enierhiju možna čerpać prosta la ŭvachodu, dzie znachodzicca pano z rossypam biełaruskich słoŭ «raźvićcio, jakaść, dasiahnieńnie, vyšynia, tvorčaść» — sapraŭdnaja «ściana natchnieńnia». Cikaŭnamu daśledniku ŭ ofisie taksama ŭdasca znajści «pakoj dla hienieracyi idej», «karčmu», «pakoj badzioraści», «pracoŭniu», «punkt telefonnaj suviazi» i zapavietny pakoj «kava ci harbata».
«Zadumaŭšysia ab prajekcie novaha ofisa, my nie prosta chacieli stvaryć novyja pracoŭnyja miescy dla supracoŭnikaŭ našaj kampanii, — paviedamiŭ hienieralny dyrektar kampanii Alaksandr Mukavozčyk. — Pierad nami stajała bolš važnaja meta — abrać kirunak našaha raźvićcia na budučyniu i stać prykładam dla inšych IT-kampanij. U našym ofisie jość vielmi važny składnik: pavaha da krainy, u jakoj my pracujem, i jaje kulturnych tradycyj. Mienavita tamu asnoŭnaja mova, jakuju my vykarystoŭvali va ŭnutranaj navihacyi — biełaruskaja».
U ofisie kampanii «Sistemnyja technałohii» možna nie tolki ŭspomnić rodnuju biełaruskuju movu, ale i ździejśnić padarožža pa samych viadomych słavutych miaścinach našaj krainy. Kožny pakoj dla pieramoŭ u ofisie nosić imia adnaho z kulturnych centraŭ Biełarusi, a ŭ samim pakoi možna palubavacca histaryčnymi słavutaściami našaj krainy. Tut Vas čakajuć Mirski i Niaśvižski zamki, pałacy ŭ Ružanach, Halšanach i Kosava.
«Da nas u hości časta pryjazdžajuć zamiežnyja partniory, ale, na žal, z pryčyny ščylnaha hrafika sustreč im redka ŭdajecca naviedać słavutaści našaj krainy. Ciapier my zmožam znajomić našych haściej z kulturnym bahaćciem Biełarusi adrazu ŭ našym ofisie», — dadaje hienieralny dyrektar. Novy ofis kampanii «Sistemnyja technałohii» — heta jašče i paćvierdžańnie taho, što tendencyja «ofis jak dom», jakaja atrymała takoje šyrokaje raspaŭsiudžvańnie ŭ ofisach takich IT-hihantaŭ, jak Google, Facebook, Microsoft, usio bolš aktyŭna vykarystoŭvajecca i ŭ nas u krainie.
«Kamfort i sučasnaść — voś dva asnoŭnyja kirunki, jakimi my išli ŭ pracesie realizacyi prajekta, — raspaviadaje namieśnik hienieralnaha dyrektara Alaksandr Žukoŭski. — Ofis IT-kampanii 21 stahodździa — heta ŭžo nie prosta pracoŭnyja miescy, abstalavanyja kampjutarami, heta paŭnavartasny kompleks, dzie supracoŭnik moža znajści ŭsio nieabchodnaje dla jaho kamfortnaj pracy i adpačynku: kuchnia, pakoi dla pieramoŭ, pakoi dla telefanavańnia, dušavaja, treninh-centr. Jašče raz adznaču kulturny składnik našaha interjera. My pracujem u Biełarusi, naša kraina — adzin ź lidaraŭ u raźvićci IT-praduktaŭ i pasłuh u śviecie».
