Мінпрацы расказала, колькі ветэранаў жыве ў Беларусі
Каля 1500 ветэранаў Вялікай Айчыннай вайны і каля 8,5 тыс. грамадзян, якія пацярпелі ад наступстваў вайны (пераважна гэта былыя вязні канцлагераў), пражывае сёння ў Беларусі, паведаміла журналістам намесніца міністра працы і сацыяльнай абароны Марына Арцёменка, паведамляе БелТА.
У мінулым годзе па стане на май было 2132 ветэраны, такім чынам, за год памерлі 600 чалавек.
Самым «маладым» удзельнікам вайны цяпер 96 гадоў. Самаму старэйшаму ўдзельніку вайны, які пражывае ў сталіцы —103 гады.
Штогод у краіне да 9 Мая праводзяцца выплаты матэрыяльнай дапамогі. У гэтым годзе яе памеры павялічаныя — 850 рублёў (для асоб, якія пацярпелі ад наступстваў вайны) да 2000 (для ўдзельнікаў і інвалідаў вайны).
Выплата матдапамогі праходзіць да 4 мая. На сёння яе атрымалі 10 тыс. чалавек на агульную суму 9,5 млн. рублёў.
