«Будзе 500 забітых у дзень. 18 дзён гэта працягнецца». Арастовіч выказаўся пра перспектывы наступу расейскіх войскаў з Беларусі
Учора Генштаб Украіны заявіў, што падвышаецца небяспека наступу расейскіх войскаў з боку нашай тэрыторыі. Аляксей Арастовіч, дарадца офіса прэзідэнта Украіны ў праграме «Фейгін LIVE» таксама пацвердзіў, што гэтая небяспека стала больш верагоднай, але для Украіны яна вырашальная.
Арастовіч распавёў, што ў Беларусь працягваецца перадыслакацыя расейскіх войскаў. Таксама ідзе прыхаваная частковая мабілізацыя ў Беларусі, у асноўным, людзей «неваенных спецыяльнасцяў».
«Ёсць пагрозы, а ёсць падрыхтоўка да пагроз. Да пагроз далёка, а падрыхтоўка да пагроз ідзе па поўнай», — кажа Арастовіч.
Паводле яго інфармацыі, каля 9 тысяч расейцаў прыбудзе ў Беларусь да канца месяца. Але для таго, каб Украіна трымала групоўку на беларускай мяжы, трэба «20-30 тысяч, не менш».
«Мінулы раз на Кіеў прыбыло да 40 тысяч, прычым гэта былі часткі не роўня цяперашнім, чым яны скончылі, зразумела», — гаворыць ён.
Паводле інфармацыі Генштаба, мэтай расейскіх войскаў, якія могуць наступаць з тэрыторыі Беларусі, павінны стаць шляхі паставак заходняй зброі. Арастовіч кажа, што гэтыя шляхі праходзяць паўднёвей.
«А па-другое, добра, хай набягуць, там мы іх яшчэ не білі. Там месцы горшыя, чым у Кіеве. Там трэба валіць па лясах, па лясных дарогах, будзе тое ж, што пад Кіевам, толькі весялей. Таму што гэтыя наогул нічога не ўмеюць», — лічыць Арастовіч.
«Палтаўскія, сумскія, чарнігаўскія фермеры папоўнілі гаспадаркі танкамі расейскімі, а вось валынскія, жытомірскія яшчэ не. Яны таксама хочуць», — кажа ён.
«Будзе прыкладна 500 забітых у дзень. 18 дзён гэта ўсё працягнецца. Усё», — упэўнены дарадца офіса прэзідэнта Украіны.
