«Сірот у нашай краіне стане яшчэ больш». У Прымор'і дэпутаты-камуністы запатрабавалі ад Пуціна спыніць «спецаперацыю» ва Украіне
На пасяджэнні заканадаўчага сходу Прыморскага краю дэпутат ад КПРФ Леанід Васюкевіч зачытаў зварот да прэзідэнта Расіі з патрабаваннем спыніць «спецыяльную ваенную аперацыю» ва Украіне, піша «Медуза».
«Мы разумеем, што калі наша краіна не спыніць ваенную аперацыю, то сірот у нашай краіне стане яшчэ больш. Падчас ваеннай аперацыі гінуць і становяцца інвалідамі маладыя людзі, якія маглі б прынесці вялікую карысць нашай краіне», — заявіў Васюкевіч. Паводле яго слоў, гэты зварот таксама падпісалі дэпутаты Наталля Качугава, Аляксандр Сустаў і Генадзь Шульга.
Відэазапіс выступу Васюкевіча апублікаваў тэлеграм-канал Newsbox24.tv. Як вынікае з запісу, Васюкевіча ўвесь час спрабавалі перабіць.
Губернатар Прымор'я Алег Кажамяка, які прысутнічаў у зале, назваў Васюкевіча «здраднікам» і заклікаў вывесці яго з залы разам з Шульгой, які падтрымаў калегу.
У выніку абодвух камуністаў пазбавілі права голасу на пасяджэнні.
Лідар фракцыі КПРФ Анатоль Далгачоў назваў выступленне сваіх таварышаў няўзгодненым дэмаршам і паабяцаў прыняць «самыя жорсткія меры», паведамляе газета.
