У Эстоніі прэзідэнтам краіны можа стаць дырэктар Нацыянальнага музея
У пятніцу 59 сябраў Рыйгікогу (парламента краіны) вылучылі дырэктара эстонскага Нацыянальнага музея Алара Карыса кандыдатам у прэзідэнты краіны. Першы тур галасавання адбудзецца ў парламенце ў панядзелак, 30 жніўня.
Цэнтрысцкая партыя і партыя рэформаў яшчэ ў нядзелю пацвердзілі, што падтрымаюць кандыдатуру Алара Карыса на пасаду прэзідэнта Эстоніі, паведамляе err.ee.
У цэнтрыстаў і рэфармістаў 59 месцаў у Рыйгікогу. Для абрання прэзідэнта краіны ў парламенце за кандыдата павінны прагаласаваць не менш за 68 са 101 дэпутата. У Эстоніі прэзідэнта абірае парламент.
Гэта азначае, што, акрамя галасоў парламентарыяў ад Цэнтрысцкай партыі і Партыі рэформаў, Карысу трэба будзе заручыцца падтрымкай альбо Сацыял-дэмакратаў, альбо партыі Isamaa.
Кансерватыўная народная партыя (EKRE) мае намер вылучыць кандыдатам у прэзідэнты Хена Пылуааса.
Алар Карыс раней займаў пасаду дзяржаўнага кантралёра, рэктара ўніверсітэта прыродазнаўчых навук і Тартускага ўніверсітэта. У кастрычніку 2017 года ён быў абраны дырэктарам эстонскага Нацыянальнага музея.
З 2016 года пасаду прэзідэнта займае Керсці Кальюлайд.
