Kavaleŭski: Nie treba pakul rabić maštabnych vysnoŭ, takija incydenty zdaralisia i raniej
Vydańnie «Zierkało» daviedałasia ŭ pradstaŭnika Śviatłany Cichanoŭskaj pa mižnarodnych spravach Valeryja Kavaleŭskaha, čamu jaho nie ŭpuścili va Ukrainu.
Pradstaŭnik Śviatłany Cichanoŭskaj pa mižnarodnych spravach, a ciapier taksama člen Abjadnanaha pierachodnaha kabinieta Valeryj Kavaleŭski 1 žniŭnia adpraviŭsia va Ukrainu — płanavaŭ naviedać Kijeŭ ciaham niekalkich dzion, kab sustrecca z dyjasparaj i pravieści pracoŭnyja sustrečy. Ale na polska-ŭkrainskaj miažy jamu admovili va ŭjeździe.
Sam pradstaŭnik demsiłaŭ nie bačyć u hetym ničoha ekstraardynarnaha i ŭdakładniaje: ukraincy jaho ŭžo razvaročvali.
Z pačatku vajny va Ukrainie Kavaleŭski naviedaŭ hetuju krainu nie mienš za vosiem razoŭ. Pavodle jaho słoŭ, užo zdarałasia tak, što jaho nie ŭpuskali na terytoryju Ukrainy ź pieršaj sproby.
«Takija incydenty adbyvalisia i raniej, pryčym nie tolki sa mnoj, ale i ź inšymi maimi kalehami.
Byvała, što nas zdymali ź ciahnika, my čakali ranicy, kali pračniecca Kijeŭ, SBU daść dabro na prajezd. Ale ŭsio dazvalałasia i my zajazdžali va Ukrainu. Adnojčy była situacyja, kali mianie nie puścili va Ukrainu i adpravili nazad u Polšču. Tady ja zrabiŭ druhuju sprobu na nastupny dzień i narmalna prajechaŭ va Ukrainu. Pryčym była taja ž samaja źmiena [na miažy], taki ž pakiet dakumientaŭ, jak i zaŭsiody», — raskazvaje Valeryj Kavaleŭski.
Dakładnych pryčyn admoŭ pradstaŭnik demsiłaŭ nie viedaje. Ale miarkuje, što heta moža być źviazana sa zbojami ŭ sistemie, ekscesami vykanaŭcaŭ ci niejkimi inšymi abstavinami. Admaŭlajučy va ŭjeździe, pamiežniki nie ŭnikajuć u padrabiaznaści, ale zvyčajna kivajuć na niedastatkovaść padstaŭ dla ŭjezdu ŭ krainu.
«Hetym razam, kali mianie nie puścili, u mianie byŭ deficyt času, i ja nie staŭ paŭtarać sprobu. Mnie treba było viartacca na kanfierencyju ŭ Vilni.
Ale pryčyny, jakija mnie padali, byli padobnyja da papiarednich: jany nie ŭbačyli dastatkovych padstaŭ dla majho znachodžańnia va Ukrainie, — kaža Kavaleŭski.
Adnak u ciažkaściach ź pierasiačeńniem miežaŭ Kavaleŭski nie vinavacić Kijeŭ. Jon kaža, što ŭ asnovie takoha stanovišča spraŭ «lažyć rašeńnie Łukašenki ŭciahnuć Biełaruś u vajnu i z-za hetaha pamianiałasia staŭleńnie da ŭsich hramadzian krainy z boku Ukrainy».
«Važna razumieć, što dla Ukrainy ciapier usie hramadzianie Biełarusi źjaŭlajucca pradstaŭnikami krainy-ahresara. Z nas asabliva pytajucca.
Na nas [ukraincy] hladziać pa-asablivamu i vielmi staranna praviarajuć nośbitaŭ biełaruskich pašpartoŭ. Mienavita tamu va ŭsich biełarusaŭ uźnikajuć takija prablemy, niezaležna ad taho, pryvatnyja heta asoby ci aficyjnyja pradstaŭniki.
Tak što sprava nie ŭ tym, što vyłučyli z natoŭpu mienavita mianie i admaŭlalisia ŭpuścić. Toje, što takoje adbyłosia z pradstaŭnikom Ofisa Śviatłany Cichanoŭskaj, nadaje hetamu peŭnuju afarboŭku, ale ja ŭsio ž nie śpiašaŭsia b rabić niejkija maštabnyja vysnovy, pakolki pakul realnaja pryčyna admovy niezrazumiełaja.
Pra admovu va ŭjeździe pradstaŭnik lidara demsiłaŭ prainfarmavaŭ partnioraŭ, dziaržstruktury ŭ Kijevie. Nastupnuju pajezdku, kaža, jon budzie płanavać paśla taho, jak atrymaje tłumačeńni ab pryčynach admovy va ŭjeździe abo zapeŭnivańni ab tym, što pierasiačeńnie miažy projdzie biez prablem.
