U Anisii Kaźluk narešcie pryniali dakumienty dla lehalizacyi va Ukrainie
U biełaruskaj pravaabaroncy i vałanciorki Anisii Kaźluk pryniali dakumienty dla lehalizacyi va Ukrainie. Pra heta dziaŭčyna paviedamiła ŭ Facebook.
«Siońnia ŭ mianie pryniali dakumienty, biez štrafu dla arhanizacyi. Praz 2 tydni ja budu viedać: praciahnuli mnie termin znachodžańnia i zmahu padać dakumienty dla VNŽ. Heta jašče nie kaniec, ale ŭžo vialiki zruch. Krychu paźniej my padrychtujem instrukcyju, jak treba dziejničać, kali vaš termin znachodžańnia praterminavany nie pa vašaj vinie» — napisała jana, padziakavaŭšy za dapamohu ŭ tym liku pradstaŭniku Śviatłany Cichanoŭskaj pa mižnarodnych pytańniach Valeryju Kavaleŭskamu, Free Belarus Center, ukrainskaj pravaabaroncy Sašy Ramancavaj.
Valeryj Kavaleŭski supravadžaŭ Anisiju padčas padačy dakumientaŭ.
«My ŭstalavali kantakty z kiraŭnictvam mihracyjnaj słužby Kijeva i Kijeŭskaj vobłaści. Dasiahnuta damoŭlenaść ab uzajemadziejańni dla vyrašeńnia padobnych prablem biełarusaŭ u Ukrainie ŭ budučyni. Chaču adznačyć dobrazyčlivy charaktar znosin i efiektyŭnaje rašeńnie situacyi z Anisijaj. Raźličvajem na toje, što hetaja niaprostaja situacyja pasłužyć karysnym precedentam dla inšych biełarusaŭ va Ukrainie», — pryvodzić jaho słovy kabiniet pradstaŭnikoŭ Cichanoŭskaj.
Anisija Kaźluk była zatrymanaja 24 červienia ŭ Kijevie za nielehalnaje znachodžańnie va Ukrainie, joj pahražała departacyja z krainy, paźniej jaje aštrafavali na 1700 hryŭniaŭ (minimalna mahčymuju sumu). U aŭtorak dakumienty ŭ Anisii nie pryniali.
