Čamu hiepatyt ciapier nie prysud i kolki pavinien atrymlivać donar płazmy kryvi?
Lačeńnie ad hiepatytu S u Biełarusi ź niadaŭniaha času stała dastupnym. Letaś dla niekatorych katehoryj chvorych jaho pačali pravodzić za biudžetnyja srodki. Niekalki ajčynnych farmaceŭtyčnych pradpryjemstvaŭ naładzili vypusk preparataŭ ad roznych formaŭ hetaha zachvorvańnia, što dazvoliła istotna skaracić košt lačeńnia. A Biełaruś stała adnoj ź pieršych krain u Jeŭropie, dzie vykarystoŭvajecca badaj samaja tannaja i dastupnaja schiema lačeńnia. Naładzić vytvorčaść patrebnych preparataŭ i, adpaviedna, zrabić lačeńnie tannym udałosia na biełaruska-hałandskim farmaceŭtyčnym pradpryjemstvie «Farmłend» u Niaśvižy.
Biaspłatnaje lačeńnie i novyja preparaty
Užo letaś ajčynnymi preparatami pralačyli bolš za 1,5 tysiačy chvorych z roznymi kliničnymi formami hiepatytu S. Na hety hod u prahramu lačeńnia za biudžetnyja srodki ŭklučyli čatyry tysiačy chvorych. Zachvorvańnie nazyvajuć «łaskavym zabojcam», bo jano raźvivajecca niezaŭvažna i bieśsimptomna i vyjaŭlajecca časta tolki na stadyi cyrozu piečani. Zarazicca im možna dzie zaŭhodna: u stamatołaha, padčas manikiuru, naniasieńnia tatuiroŭki — lubych manipulacyj, jakija viaduć da paškodžańnia skury i ślizistaj.
— Da peŭnaha času hiepatyt S ličyŭsia prysudam, drenna paddavaŭsia lačeńniu. Potym staŭ lačycca lepš, bo źjavilisia amierykanskija aryhinalnyja preparaty, ale heta było vielmi doraha. Cana adnoj upakoŭki, jakoj chapała na miesiac, — 20 tysiač dołaraŭ. Uličvajučy, što kurs lačeńnia — try-čatyry miesiacy, to jano kaštavała 60, a to i 80 tysiač, — raskazvaje namieśnik hienieralnaha dyrektara pa navukovaj i inavacyjnaj rabocie kampanii «Farmłend» Vadzim Siančuk. — My ŭkłali vialikija hrošy ŭ raspracoŭku, praviali kliničnyja vyprabavańni, u tym liku i paraŭnalnyja. Akazałasia, što našy preparaty ekvivalentnyja najlepšym suśvietnym brendam. Siońnia ŭ krainie raźvivajecca dziaržaŭnaja prahrama dyjahnostyki i lačeńnia hiepatytu S. I my ŭdzielničajem u joj, pastaŭlajučy svoj pradukt.
Darečy, efiektyŭnaść lačeńnia kambinacyjaj z dvuch preparataŭ — sofasbuviru i dakłataśviru — składaje 98 pracentaŭ. Košt kursa — kala 900 dołaraŭ. Takaja kambinacyja šyroka prymianiajecca ŭ inšych krainach, naprykład u Indyi i Iranie. Z ulikam šyrokaha raspaŭsiudžańnia chraničnaj formy ŭ Biełarusi ŭ śpisy pieršačarhovaha lačeńnia ad hiepatytu S za košt biudžetu ŭvachodziać pacyjenty z 3-j i 4-j stadyjami fibrozu piečani, z najaŭnaściu pazapiačonačnych prajaŭ zachvorvańnia, miedycynskija rabotniki i tyja, chto zaraziŭsia hetaj infiekcyjaj pa pryčynie vykanańnia prafiesijnych abaviazkaŭ, žančyny repraduktyŭnaha ŭzrostu, jakija płanujuć ciažarnaść ci majuć pakazańni da EKA, i niekatoryja inšyja katehoryi. Ale nabyć hetyja preparaty možna i ŭ aptecy.
— My bačym, što naš kurs z časam moža stać jašče tańniejšym — 400—500 dołaraŭ, — kaža saŭładalnik i staršynia savieta dyrektaraŭ kampanii «Farmłend» Ivan Łahavoj. — U nas jość ideja arhanizavać dla zamiežnych hramadzian, u pieršuju čarhu dla rasijan, taki varyjant miedycynskaha turyzmu. U Rasii patentna zabaroniena vytvorčaść hetych preparataŭ. I siońnia jany jeduć u Indyju, Jehipiet, Banhładeš, zakuplajuć leki tam, ale mohuć pryjechać da nas. Tym bolš što ŭ nas pacyjent budzie znachodzicca pad kantrolem uračoŭ, što nieabchodna pry lačeńni takoj ciažkaj virusnaj infiekcyi, jak hiepatyt S.
Kolki kaštuje płazma?
Pradpryjemstva, jakoje kaliści pačynała svaju rabotu ŭ arendavanych pamiaškańniach, zaraz maje ŭłasnyja cechi pa vytvorčaści vadkich lekavych srodkaŭ (rastvoraŭ dla injekcyj i infuzij, kancentrataŭ dla hiemadyjalizu), ćviordych lekavych formaŭ i zavod pa vytvorčaści lekavych srodkaŭ na asnovie płazmy kryvi. Kala 10 % pradukcyi pastaŭlajecca na ekspart. Letaś, darečy, jon vyras u niekalki razoŭ: tut asvoili vypusk preparatu dla narkozu, jaki akazaŭsia zapatrabavanym u Rasii. Ale ŭ hieahrafii ekspartu jość i takija ekzatyčnyja krainy, jak Vjetnam.
— Treba šukać svabodnyja nišy, dzie ciabie čakajuć, — kaža Ivan Łahavoj. — Nazapasiŭšy vopyt pracy sa zvyčajnymi preparatami, my zrazumieli, što možam zrabić štości, kab nie kankuryravać ź inšymi. I ŭ 2016 hodzie pabudavali zavod pa pierapracoŭcy płazmy kryvi čałavieka. Takich prajektaŭ na postsavieckaj prastory nie było. Paralelna z nami budavali zavod va Ukrainie, a voś niekalki sprob zapuścić takoje pradpryjemstva ŭ Rasii pośpiecham nie ŭviančalisia.
Mahutnaści biełaruskaha zavoda dazvalajuć pierapracoŭvać 600 tysiač litraŭ płazmy ŭ hod — značna bolš, čym patrebna Biełarusi. Tamu na pradpryjemstvie šukajuć sposaby pierapracoŭvać rasijskuju płazmu. Z hetaj syraviny tut asvoili vytvorčaść žyćciova važnych preparataŭ — albuminu, imunahłabulinu, faktaraŭ zhusalnaści kryvi VII i ICH. Jany zapatrabavanyja ŭ chirurhičnaj praktycy, transpłantałohii, ankałohii, kardyjachirurhii. Praces vytvorčaści składany i doŭhi. Zamarožanaja płazma zavozicca ŭ chaładzilniki, dzie zachoŭvajecca pry tempieratury minus 30 hradusaŭ. Pry pierapracoŭcy ŭ śpiecyjalnych centryfuhach i filtrach z dapamohaj chimičnych reakcyj idzie jaje raździaleńnie na lačebnyja kampanienty.
— U Biełarusi vypłaty donaram kryvi dastatkova vialikija, za 450 mililitraŭ płazmy čałaviek atrymlivaje kala 70 dołaraŭ. U Rasii i Polščy heta robicca na biazvypłatnaj asnovie, va Ukrainie suma značna mienšaja — 8 dołaraŭ. Tamu naša płazma ŭdvaja daražejšaja, čym na suśvietnym rynku. Adpaviedna, kali vyrablać preparaty z našaj płazmy, jany atrymlivajucca niekankurentazdolnymi pa canie. Pry hetym Suśvietnaja arhanizacyja achovy zdaroŭja rekamienduje vykarystoŭvać mienavita miascovuju płazmu — jana źmiaščaje imunahłabuliny suprać tych antyhienaŭ, jakija jość u asiarodździ pražyvańnia. Tamu inšych varyjantaŭ, akramia jak zrabić płazmu bolš tannaj, niama, — upeŭnieny Ivan Łahavoj.
Pradpryjemstva pabudavała try płazmacentry pa jeŭrapiejskich standartach, dzie płazmu mohuć zdavać donary, — u Minsku, Maładziečnie i Babrujsku. I hatova biazvypłatna pieradać ich dziaržavie.
— My nie vystupajem za toje, kab atrymlivać płazmu biaspłatna, — kaža staršynia savieta dyrektaraŭ. — Donar patraciŭ nie tolki čas, i kampiensacyja pavinna być, ale jana musić być razumnaj, — 25 dołaraŭ, jak u Jeŭropie. My znachodzim razumieńnie z boku Ministerstva achovy zdaroŭja ŭ hetym pytańni, i miarkuju, z časam bałans u canie budzie ŭstalavany.
