Jak zrabić piermanientny makijaž i nie paškadavać ab hetym
U śfiery pryhažości ŭsio bulkoča i burlić, pastajanna raźvivajecca i nie zatrymlivajecca ni na siekundu. Piermanientny makijaž — nie vyklučeńnie, z kožnym dniom jon stanovicca ŭsio bolš papularny, ale i pamyłak, źviazanych ź im, jašče vielmi šmat.
Kraŭnica studyi piermanientnaha makijažu Łada Bałakirava dapamahaje razabracca ŭ tym, što takoje piermanientny makijaž i adkazvaje na pytańnie: ci sapraŭdy jano vam treba?
Što takoje piermanientny makijaž?
Ź miedycynskaha punktu hledžańnia, piermanientny makijaž — heta ŭviadzieńnie farbavalnaha rečyva ŭ skuru na hłybiniu 0,3—0,8 milimietraŭ. Kali majstar zrabiŭ usio pravilna, to piermanient budzie nasicca ad hoda (piermanientny makijaž brovaŭ) da piaci hadoŭ (kali havorka idzie ab strełkach).
Kali ŭnieści pihmient bližej da pavierchni skury, piermanientny makijaž źniknie praź miesiac pa abnaŭleńni epidermisu, kali bolš hłyboka — atrymajecca tatuiroŭka, jakaja ŭ chutkim časie nabudzie niepryjemnaje adcieńnie (błakitnavataje, zialonaje abo čyrvonaje) i samastojna poŭnaściu nie źniknie nikoli, spatrebicca doŭhaje i darahoje vydaleńnie pry dapamozie, naprykład, miedycynskaha łaziera.
Tamu nie varta prasić majstra zrabić vam brovy na ŭsio žyćcio, heta nierealna, pryjdziecca vybirać: abo pryhoža, abo naviečna. Akramia taho, dla sučasnaha piermanientu vykarystoŭvajucca zusim inšyja aparaty i pihmienty, čym dla tatu, tak što słova «tatuaž», a ź im i žudasnyja płastylinavyja brovy z 90-ch vielmi chutka sychodziać u minułaje, choć dzie-nidzie, na žal, jašče sustrakajucca.
Vidy piermanientu: ich usiaho dva
Isnujuć tolki dva vidy piermanientnaha makijažu — aparatny, jaki vykonvajecca mašynkaj, i ručny — pry dapamozie manipuła z zamacavanym na im lazzom, jaki taksama nosić nazvu mikrabłejdynh.
Navučycca mikrabłejdynhu i sabrać startavy nabor u razy tańniej i chutčej, čym navučycca aparatnamu piermanientu.
Mienavita tamu prasoŭvańnie ručnoha piermanientu časam navat pałochaje svajoj ahresiŭnaściu.
Na samaj spravie, heta čysty markietynh, bo z techničnaha boku i aparatny, i manualny vidy piermanientu nie adroźnivajucca absalutna ničym, akramia instrumienta.
Kali čahości chočacca. Jaki piermanient zrabić sabie?
Na siońniašni dzień najbolšaj papularnaściu karystajecca piermanient brovaŭ.
Jon moža być vykanany ŭ technicy cienievaj rastušoŭki. Jana taksama moža nazyvacca napyleńniem, nananapyleńniem, pudravymi brovami. Moža być u vałaskovaj technicy i źmiašanaj: rastušoŭka + vałasok.
Pry vybary techniki majstar budzie adšturchoŭvacca nie tolki ad vašych pažadańniaŭ, ale i ad typu skury. Vałaskovaja technika padychodzić nie ŭsim, u adroźnieńnie ad rastušoŭki.
Bazavyja varyjanty piermanientu paviek — heta mižpaviekavy, kłasičny i rastušavanaja strełka.
Zvyčajna dla ich vybirajuć adnosna niejtralnyja adcieńni čornaha, šeraha i karyčnievaha, kab nie nadakučyli, bo termin našeńnia strełak da abnaŭleńnia davoli vialiki, ad dvuch da piaci hadoŭ.
Piermanient vusnaŭ taksama absalutna nie abmiežavany ŭ kolerach, tamu vy možacie pakazać majstaru koler ulubionaj pamady, kab padabrać niešta padobnaje.
Pavialičvać vusny pry dapamozie piermanientnaha makijažu abo rabić tolki kontur nie rekamiendujecca — heta budzie vielmi zaŭvažna.
Siarod inšych mahčymaściaŭ piermanientu: trychapihmientacyja (imitacyja vałasinak tam, dzie ich niama, naprykład, u paradziełym prabory abo navat kakietlivaja pałosačka ŭ intymnych miescach), kamuflaž šnaraŭ i rubcoŭ, viasnuški i muški, a taksama rekanstrukcyja areoły paśla mamapłastyki.
Čym vy ryzykujecie, advažyŭšysia na piermanient?
U pieršuju čarhu, havoračy pra pieravahi piermanientnaha makijažu, zvyčajna nazyvajuć, ułasna, jaho stojkaść, niepaduładnaść kapryzam nadvorja, a taksama ekanomiju času i siły.
Piermanient budzie vielmi karysny tym, chto nie lubić, nie ŭmieje ci nie moža (naprykład, z-za alerhii) karystacca dekaratyŭnaj kaśmietykaj; tym, u kaho jość vyjaŭlenaja asimietryja vusnaŭ ci brovaŭ, jakuju chočacca vypravić; tym, chto pieranios traŭmu abo apieracyju i choča schavać jaje ślady.
Kali ničoha ź pieraličanaha da vas nie adnosicca, ale zrabić piermanient chočacca, kali łaska — ale tolki pierakanajciesia ŭ adsutnaści supraćpakazańniaŭ i abiarycie dobraha majstra.
Vy vielmi ryzykujecie, kali chočacie zekanomić na pracedury ci schadzić da siabroŭki na dom, bo tak možna narvacca na niadobrasumlennaha majstra ź niaćviordaj rukoj, syści ad jaho z sapsavanym tvaram abo, što samaje strašnaje, niečym zarazicca.
Jak vybrać majstra?
Pa-pieršaje, dobry piermanient nie moža być tannym. Jakasnyja pihmienty, raschodnyja materyjały, abstalavańnie i navučańnie kaštuje doraha, a dośvied majstra — jašče daražej.
U siarednim za pieršuju praceduru ŭ Minsku pryjdziecca vykłaści ad 200 da 300 rubloŭ, plus karekcyja, jakaja robicca praz na paŭtara-dva miesiacy.
Chaj vas nie biantežyć słova «karekcyja» — heta nie vypraŭleńnie pamyłak, a zamacavańnie vyniku, bo za čas hajeńnia arhanizm budzie sprabavać pazbavicca ad pihmientu, jaki dla jaho, jak ni kruci, čužy; mienavita tamu śviežy piermanient zvyčajna značna jarčejšy, čym toj, što ŭžo zažyŭ.
Pa-druhoje, pryjšoŭšy na praceduru, abaviazkova pierakanajciesia, što ŭ kabiniecie čysta, vykarystoŭvajucca adnarazovyja raschodnyja materyjały, a ŭsie pavierchni, da jakich majstar patencyjna moža dakranucca, abaronieny survetkami abo plonkaj.
Pa-treciaje, pierad sieansam acanicie naniesieny majstram eskiz, praviercie, ci simietryčny jon, udakładnicie, jaki koler atrymajecca ŭ vyniku, u ideale eskiz pavinien vyhladać hetak ža, jak vaš piermanient, kali toj zahoicca.
Pa-čaćviortaje, vam nie pavinna być baluča! Pakolki padčas pracedury skura paškodžvajecca, mahčymyja niepryjemnyja adčuvańni, jakija majstar pavinien minimizavać pry dapamozie hiela-aniestetyka, na ŭkoły nie zhadžajciesia, bo ich moža rabić tolki doktar, dy i nieabchodnaści ŭ ich niama.
Što rabić paśla?
Paśla pracedury vam pavinny padrabiazna raskazać ab dohladzie zony piermanientu.
Usie majstry sychodziacca ŭ tym, što skuru treba pakinuć u spakoi na ŭvieś pieryjad hajeńnia — nie rasparvać, nie cierci, nie nanosić kaśmietyku, trymać u suchaści i čyścini.
Praź miesiac paśla pieršaj pracedury vy razam z majstram prymajecie rašeńnie ab nieabchodnaści karekcyi, a zatym zastajecca tolki nasić i radavacca.
