«IBA — zanadta «saŭkovaja» kantora» — acenki internet-kamientataraŭ palarna padzialilisia
Pravaachoŭnyja orhany Biełarusi zacikavilisia dziejnaściu kiraŭnictva bujnoj i adnoj z najstarejšych IT-kampanij Biełarusi — IBA Group.
Jak paviedamili TUT.BY niekalki krynic, u pole zroku siłavikoŭ trapili staršynia praŭleńnia IBA Group, hiendyrektar IBA Minsk Siarhiej Laŭciejeŭ i siabra praŭleńnia, pieršy namieśnik staršyni praŭleńnia IBA Group, dyrektar pa raspracoŭcy PZ, hiendyrektar IBA IT Park Siarhiej Akulič. Pryčym, pa niepaćvierdžanaj pakul infarmacyi, apošni ŭžo tydzień jak zatrymany.
Navina vyklikała bujnoje abmierkavańnie na sajtach ŚMI i forumach — usio ž IT-śfiera ŭsprymajecca ledź nie nacyjanalnym simvałam siońniašniaj Biełarusi.
Hramadstva faktyčna padzialiłasia — pałova škaduje zatrymanych, ličyć, što biełaruskaja dziaržava «pilić suk na jakim siadzić», i pieražyvaje, što biznes pa-biełarusku — heta kali ŭ luby momant ciabie mohuć «uziać».
«Palicejskaja dziaržava!», «Dačakajucca, što ŭsie ajcišniki źjeduć u Polšču i Litvu», — stohnuć kamientatary.
«Uvohule, pasadka zasnavalnikaŭ adnoj z najbujniejšych jeŭrapiejskich IT-kampanij — heta realnaja škoda. IBA — brend, viadomy na ŭvieś śviet. Nie viedaju kampanij z IT-śfiery, jakija nie viedali b pra IBA (darečy, kampanija zarehistravanaja ŭ Čechii, ale ŭsie viedajuć, što asnoŭny centr raspracoŭki ŭ RB). Heta daŭno ŭžo biełaruski fłahman, značna pakruciej za ŭsialakija MAZy i traktary. Horšaha ŭdaru pa imidžy krainy składana sabie ŭjavić. Ja tamu ŭpeŭnieny, što admysłova niechta škodzić. Nie budzie ŭ nas imidžu — nie budzie inviestycyj, nie budzie inviestycyj — nie budzie ekanomii. Tyja ž siłaviki mohuć užo praz paru hadoŭ atrymlivać zarpłatu pa 30-40 dalaraŭ na miesiac. I što potym? Znoŭ 90-ja?», — vykazvaje mierkavańnie adzin z čytačoŭ tut.by.
Ale ž druhaja pałova stavicca da zatrymańnia bolš skieptyčna — i vykazvaje davoli cikavyja dumki:
«Paznavata niejak. Biudžetnych hrošaj imi ŭžo papiłavana za hetyja hady stolki, što možna było b kožnamu biełarusu płanšety raz na hod daryć, a nie tolki «členam» źjezdaŭ. A pa fakcie — chutka zamnuć, tam u zakazčykach ŭvieś dziaržaparat, i kali pačnuć kapać, to pryjdziecca ŭžo vielmi šmat «ludziej» paturbavać. Abmiažujucca drobnym kasiačkom, kab nie varušyć asinaje hniazdo. Na čarzie čakajem razborak z BeCloud i MPZ, za «piśmiennaje» vydatkoŭvańnie biudžetnych srodkaŭ na «mieha-supier-pupier» sistemu ŭliku ESČF».
«Zanadta ŭžo ciesna IBA pracavała z mnohimi klijentami, dy i sama struktura kampanii intehratara davała asablivyja mahčymaści pracy, chto ŭ temie, zrazumieje. Mabyć, raskačali za bankaŭskaje prahramnaje zabieśpiačeńnie».
«Kali i buduć treści, to za bankaŭskaje prahramnaje zabieśpiačeńnie. Usio astatniaje zanadta žorstka dla ŭsprymańnia naroda, dy i kanfiskavanyja katedžy z mašynami nikomu nie patrebnyja — kamu ich pradać? Praściej źlić paru čynoŭnikaŭ z banka — źniać niedapłačanyja padatki i štraf z žyvoj IBA i adpuścić. Chto, akramia ich, raźbiare toje, što jany navaracili ŭ dziaržsiektary za 20 hadoŭ pracy? Durniaŭ niama, nie voźmiecca nichto — inakš los IBA napatkaje i ich. Pahladzicie bujnych sistemnych intehrataraŭ — chto ich klijenty. Heta takoje łohava, dzie zamiašanyja ŭ schiemach usie: i DFR, i KDB, i MUS. Usie absalutna».
«IBA sapraŭdy kantora svojeasablivaja. Zanadta «saŭkovaja» u paraŭnańni ź inšymi arhanizacyjami PVT. Aktyŭna supracoŭničaje ź dziaržarhanizacyjami abo zusim siadzić na dziaržzakazie. Košt pasłuh, u tych redkich vypadkach, kali jany nadajucca ahałoscy, vyklikaje pytańni. Tamu, z adnaho boku, nie vielmi ździŭleny, što za ich uzialisia. Ale ź inšaha boku, viedajučy, jak u nas rasśledujuć ekanamičnyja złačynstvy, čakać možna čaho zaŭhodna».
«Cikava, čamu DFR nijak nie adreahavaŭ na toje, čamu Minsktrans zakupiŭ u IBA biessensoŭnyja kampościery pa 600 dalaraŭ paru hadoŭ tamu, choć tam złačynstva prosta na dałoni lažała: biary ŭsich udzielnikaŭ ciopleńkimi! A tut prama žyva zacikavilisia tym, što jašče dakazać treba».
«Chłopcy, ajcišniki tut ni pry čym. IBA pieravažna pracuje na ŭnutrany rynak, banki i dziaržzamova — Biełčyhunka, dakumientaabarot. Heta nie toje ž samaje, što JEPAM i inšyja aŭtsors-kampanii, jakija dapamahajuć piłavać hrošy amierykanskaha ŭrada ci inviestaraŭ, nu ci sumlenna pracujuć. Hetyja piłujuć hrošy biełaruskaha biudžetu. Viadoma, i ŭ IBA pracujuć dobryja chłopcy, narmalnyja prahramisty, ale hetaja kantora značna bližej da dziaržustanoŭ pa arhanizacyi. A ŭžo funkcyjaniery ich — asobnaja tema, stararežymnyja dziadźki. Voś ich i buduć treści».
«Ja jašče małady prahramist, ale zaniesła i va ŭsim viadomy Itransition i ŭ adzin ź vielmi małalikich dvajniat IBA, na jakija zaviazanyja banki i dziaržmanapalisty — kamientatar vyšej spravu kaža. Heta dva zusim roznyja śviety. I mnie ani siekundy nie škada ani IBA, ani taho bliźniuka, dzie pracuju ciapier, kali im kali-niebudź zojmucca».
