У Мінску хлопцы здалі на металалом чужое аўто, а грошы патрацілі нечакана
У Мінску трое маладых людзей скралі машыну, здалі яе на металалом, а за атрыманыя грошы купілі плюшавага мядзведзя ды павячэралі ў рэстаране. Пра гэтае здарэнне ў Заводскім раёне сталіцы паведамляе ГУУС Мінскага гарвыканкама.
Фота: ГУУС Мінгарвыканкама / Telegram
У міліцыю звярнуўся ўладальнік аўтамабіля «Жыгулі», які заявіў, што машына знікла з паркінга гандлёвага цэнтра. Паводле мужчыны, аўтамабіль ён не замыкаў, а зламаны ключ захрас у замку запальвання.
Міліцыянты высветлілі, што трое сяброў ва ўзросце ад 18 да 20 гадоў спачатку скралі з машыны набор інструментаў, які здалі ў ламбард за 60 рублёў. Грошы выдаткавалі на алкаголь.
На наступны дзень яны вырашылі адвезці аўтамабіль на металалом. На атрыманыя 250 рублёў хлопцы набылі плюшавага мядзведзя і павячэралі ў рэстаране.
Супраць хлопцаў завялі крымінальную справу паводле артыкула «Крадзеж».
