Колькі беларусаў зарабляе менш за 500 рублёў, а колькі больш за 5000 рублёў
Каля 43% беларусаў зарабляюць менш за 1000 рублёў у месяц. Гэта вынікае са звестак Белстата аб размеркаванні колькасці работнікаў па памеры налічанага заробку ў лістападзе 2021 года. Пры гэтым сярэдні заробак у Беларусі, па афіцыйных даных, у гэтым жа месяцы перавышаў 1470 рублёў, піша Zerkalo.
Да 300 рублёў у лістападзе мінулага года атрымлівалі 1,1% работнікаў, ад 300,1 да 400 рублёў — таксама 1,1%, ад 400,1 да 500 рублёў — 5,6%, ад 500,1 да 600 рублёў — 6,7%.
Заробкі ад 600,1 да 800 рублёў былі ў 14,4% работнікаў, ад 800,1 да 1000 рублёў — таксама ў 14,4%.
Ад 1000,1 да 1500 рублёў зараблялі 28,7% работнікаў, ад 1500,1 да 2000 рублёў — 14,2%, ад 2000,1 да 5000 рублёў — 12,2%.
Пры гэтым заробкам больш за 5000 рублёў у лістападзе мінулага года маглі пахваліцца 1,6% работнікаў.
Сярэдні заробак у лістападзе мінулага года склаў 1 476,3 рубля. У параўнанні з кастрычнікам ён знізіўся на 2 рублі 60 капеек.
