Jašče adnaja amierykanskaja kampanija sychodzić ź Biełarusi
Softeq Development aficyjna likviduje biełaruskuju jurydyčnuju asobu. Takaja infarmacyja źjaviłasia na sajcie Adzinaha dziaržrehistra, piša Dev.by.
Aficyjna ŭ likvidacyi minski centr raspracoŭki Softeq Development znachodzicca ad 23 krasavika. Rašeńnie pra zakryćcio kampanii było pryniata ŭłaśnikam.
Pra namier Softeq Development syści ź Biełarusi supracoŭniki minskaha ofisa raskazali dev.by jašče na pačatku krasavika. Pavodle słoŭ surazmoŭcaŭ, paśla 24 lutaha 2022 h. — pačatku poŭnamaštabnaha ŭvarvańnia Rasii va Ukrainu — top-mieniedžmient Softeq Development «pryniaŭ rašeńnie zakryć ofis raspracoŭki. Kampanija nastojvała na rełakacyi supracoŭnikaŭ. Dapamahała ź vizami i davała nievialikuju rełakacyjnuju kampiensacyju — kala 1000 dalaraŭ».
Adnym z varyjantaŭ dla pierajezdu stała Litva. Pavodle danych rekvizitai.vz.lt, za minuły i hety hod štat litoŭskaha ofisa Softeq Development vyras amal u 5 razoŭ — z 30 da bolš čym 130 supracoŭnikaŭ. Z tymi, chto admoviŭsia ad rełakacyi, raźvitalisia, śćviardžajuć śpikiery.
U minskim ofisie Softeq Development pracavała kala 280 śpiecyjalistaŭ. Kolki ź ich u vyniku było zvolniena, nieviadoma. Pavodle acenak adnaho z surazmoŭcaŭ, «rełakavałasia kala 200 čałaviek».
U linkiedzinie jość profili 75 čałaviek, jakija paznačyli ŭ jakaści aktualnaha miesca pracy Softeq Development i Biełaruś u jakaści łakacyi. Nieviadoma, pracujuć jany ŭ Biełarusi ci «nie abnavili łakacyju».
Softeq Development zasnavana ŭ 1997 hodzie. Štab-kvatera kampanii znachodzicca ŭ Chjustanie, štat Techas. U 2008 hodzie ŭ Minsku byŭ adkryty centr raspracoŭki — «Softek Deviełapmient». Ad lipienia 2009 hoda kampanija źjaŭlajecca rezidentam PVT.
Softeq Development raspracoŭvaje prahramnaje zabieśpiačeńnie i «žaleza» na zakaz dla takich klijentaŭ, jak Microsoft, Coca-Cola, Epson, Samsung. Taksama kampanija akazvaje pasłuhi ŭ halinie raspracoŭki veb-rašeńniaŭ, mabilnych prahram i hulniaŭ, ubudavanych sistem i nizkaŭzroŭnievych utylit, a taksama multypłatformavych prahram.
Softeq Development stała čarhovaj amierykanskaj kampanijaj, jakaja syšła ź Biełarusi. Raniej biznes u Biełarusi zakryli takija bujnyja kampanii jak WorkFusion, Arteza, EIS Group.
Čytajcie taksama:
Wargaming abahnaŭ EPAM i lidziruje pa padatkach u Litvie
IT-kampanii ź biełaruskimi karaniami zaniali za hod pałovu ajcišnych ofisaŭ Vilni
