ŚMI vyśvietlili, kolki moža kaštavać adzin dzień pracy ChatGPT. I heta suma astranamičnaja
«Havorka idzie tolki pra staruju madel ChatGPT-3, novaja ž čaćviortaja viersija abychodzicca jašče daražej».
U ŚMI pratačyłasia infarmacyja ab košcie štodzionnaha padtrymańnia pracy viadomaj niejrasietki ChatGPT. Adzin taki dzień moža kaštavać amal 700 tysiač dalaraŭ i navat bolš.
Mienavita stolki, pa infarmacyi vydańniaŭ Business Insider i The Information, płacić kampanija OpenAI (raspracoŭščyk ChatGPT) za adzin dzień pracy štučnaha intelektu pa ŭsim śviecie (hetaja suma nie ŭklučaje vydatki na navučańnie niejrasietki, jana datyčyć tolki apieracyj pa vyličeńni i vydačy adkazaŭ karystalnikam).
Abodva vydańni spasyłalisia na Dyłana Patela, hałoŭnaha analityka firmy SemiAnalysis, jakaja zajmajecca daśledavańniem technałohij paŭpravadnikoŭ. Pavodle jaho słoŭ, taki vielizarny košt abumoŭleny vykarystańniem darahich vytvorčych mahutnaściaŭ, jakija zabiaśpiečvajuć chutkija i dakładnyja raźliki adkazaŭ z boku štučnaha intelektu.
«Funkcyjanavańnie ChatGPT abychodzicca OpenAI ŭ 694,444 dalara kožnyja sutki. Bolšaja častka hetych vydatkaŭ zasnavanaja na vykarystańni 3617 darahich siervieraŭ HGX A100, kudy ŭvachodziać 28,936 hrafičnaha pracesara. Košt adnaho zvarotu da čat-bota składaje 36 centaŭ (albo 1 rubiel)», — raskazaŭ Dyłan Patel vydańniu The Information.
Analityk taksama padkreśliŭ vydańniu Business Insider, što hetaja suma adnosicca tolki da papiaredniaj, treciaj viersii niejrasietki. Praca siońniašniaj madeli ChatGPT-4 budzie kaštavać jašče daražej, tamu kampanija OpenAI i ŭviała płatnuju padpisku na karystańnie mahčymaściami čaćviortaj viersii, kab kampiensavać vydatki.
U hety ž čas karparacyja Microsoft, pa infarmacyi Patela, zajmajecca raspracoŭkaj svajho ŭłasnaha čypa Athena, jaki pavinien istotna skaracić vydatki na vytvorčuju mahutnaść niejrasietki. Hety čyp moža vyjści ŭžo ŭ nastupnym hodzie.
Čytajcie taksama:
Kitaj choča, kab štučny intelekt adlustroŭvaŭ asnoŭnyja kaštoŭnaści sacyjalizmu
Skłali dla vas vialiki TOP karysnych niejrasietak na ŭsie vypadki žyćcia
