«Rejkavaha partyzana» ŭ Lidzie pakarali tryma hadami kałonii
Sud Lidskaha rajona 14 listapada vynies prysud Dźmitryju Miadźviedskamu, jakoha abvinavacili ŭ arhanizacyi i padrychtoŭcy dziejańniaŭ, jakija hruba parušajuć hramadski paradak, psavańni šlachoŭ znosin i abrazie prezidenta, paviedamlaje «Viasna».
Sudovy praces viała sudździa Natalla Łoban, jakaja zusim niadaŭna, 26 vieraśnia, była pryznačana sudździoj na 5 hadoŭ.
Miadźviedskaha zatrymali 2 vieraśnia 2022 hoda, a ŭžo 6 vieraśnia 2022 hoda źjaviłasia «pakajalnaje» videa z zatrymańniem Dźmitryja, u jakim jon paviedamlaje, što ŭ 2020 hodzie znachodziŭsia ŭ čacie «Lida 97%», dzie aktyŭna pisaŭ paviedamleńni. Taksama pisaŭ ab svaich dziejańniach u płanie «Pieramoha».
Pavodle viersii siłavikoŭ mužčyna zaklikaŭ da zabastoŭki, pratestaŭ, a taksama prapanoŭvaŭ arhanizoŭvać dyviersii na čyhuncy.
Jaho abvinavačvajuć adrazu pa troch artykułach Kryminalnaha kodeksa:
č. 1 art. 309 KK — naŭmysnaje psavańnie transpartnaha srodku ci šlachoŭ znosin;
č. 1 art. 342 KK — arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich;
č. 1 art. 368 KK — abraza prezidenta.
Sud zaviaršyŭsia za adzin dzień. Sudździa Natalla Łoban pryznała Miadźviedskaha vinavatym i pakarała jaho pazbaŭleńniem voli terminam na try hady va ŭmovach kałonii ahulnaha režymu.
