«Cisk Maskvy» i «handlar savieckim pavietram». Što pišuć ukrainskija ŚMI paśla taho, jak Łukašenka pryznaŭ Krym?
«Krym de-fakta — heta rasijski Krym, paśla refierendumu i de-jure jon staŭ rasijskim», — zajaviŭ Alaksandr Łukašenka ŭ intervju rasijskamu prapahandystu Dźmitryju Kisialovu. Heta adrazu vyklikała burnuju reakcyju i ŭ Biełarusi, i ŭ Rasii. A jak adreahavali ŭkrainskija miedyja?
U asnoŭnym ukrainskija vydańni šyroka cytujuć słovy Dźmitryja Kuleby, kiraŭnika MZS Ukrainy:
«Ja dumaju, što niama sensu aceńvać kožnaje prajaŭleńnie patoku śviadomaści, jakoje rehularna ažyćciaŭlaje na roznych miedyjnych płatformach Alaksandr Łukašenka. My budziem aceńvać jaho dziejańni.
Kali Biełaruś sapraŭdy pryznaje niezakonnuju akupacyju Kryma Rasijaj, heta naniasie niepapraŭny ŭdar pa ŭkrainska-biełaruskich adnosinach. My budziem dziejničać pa poŭnaj prahramie, Krym nie źjaŭlajecca pytańniem, u jakim my dazvalajem sabie strymlivacca».
Partał delo.ua prosta pryvodzić słovy Łukašenki pra Krym, ale nazyvaje jaho «nielehitymnym prezidentam»:
«Nielehitymny prezident Biełarusi Alaksandr Łukašenka zajaviŭ, što nibyta «paŭvostraŭ Krym — terytoryja Rasii», i ciapier jon čakaje ad rasijskaha boku zaprašeńnia ŭ Krym z kankretykaj pa terminach. Niepryznany prezident zajaviŭ, što jahonaja pajezdka ŭ Krym budzie aznačać pryznańnie paŭvostrava častkaj Rasii».
Darečy, hetaksama abaznačajuć Łukašenku i šmat jakija inšyja ŭkrainskija ŚMI, nazyvajučy jaho «samaabvieščanym prezidentam» ci navat «dyktataram».
«Havorka idzie ab pryznańni časova akupavanaha Kryma «rasijskim» pryvatnaj asobaj»
Ahladalnik partała Obozrevatel Lilija Karniłava piša, što «Łukašenka padmanuŭ Pucina».
«Ułady šerahu krain admovilisia pryznać Alaksandra Ryhoraviča lehitymnym prezidentam Biełarusi paśla prezidenckich vybaraŭ biez vybaru ŭ 2020 hodzie. Pra heta zajavili Vialikabrytanija, Hiermanija, Danija, Kanada, Łatvija, Litva, Niderłandy, Narviehija, Polšča, Słavakija, ZŠA, Ukraina, Francyja, Čechija, Estonija i inšyja.
Tak što ŭ hetym vypadku havorka idzie ab pryznańni časova akupavanaha Kryma «rasijskim» pryvatnaj asobaj, a nie aficyjnym pradstaŭnikom respubliki.
Ni vusnyja, ni piśmovyja zajavy Alaksandra Ryhoraviča, u tym liku ŭ ramkach Sajuznaj dziaržavy, nie abaviazvajuć u jurydyčnym sensie biełarusaŭ i dziaržavu.
Navat rasijskija ŚMI akcentujuć uvahu na tym, što časova akupavany Krym «rasijskim» pryznaŭ mienavita Łukašenka, a nie Respublika Biełaruś, dy i toje z ahavorkaj — paśla vizitu na paŭvostraŭ», — adznačaje Karniłava.
«Z 1994 hoda Łukašenka pradaje Kramlu bajku ab chutkaj intehracyi Rasii i Biełarusi»
Žurnalist Vital Portnikaŭ, ahladalnik nv.ua, miarkuje:
«Łukašenku nazyvajuć «handlarom savieckim pavietram». Z 1994 hoda jon pradaje Kramlu bajku ab chutkaj intehracyi Rasii i Biełarusi. Jaho intehracyjnymi pasłuhami karystalisia i Barys Jelcyn, i Uładzimir Pucin, i Dźmitryj Miadźviedzieŭ, a ŭ adkaz vyłučali resursy, jakija dazvalajuć padtrymlivać na płavu biełaruskuju ekanomiku, jakaja zastałasia šmat u čym u minułym.
Adnak paśla 2020 hoda, kali Łukašenka ŭ čarhovy raz sfalsifikavaŭ vyniki vybaraŭ prezidenta Biełarusi i zadušyŭ masavyja pratesty svaich suajčyńnikaŭ, jamu ŭsio ciažej adbicca ad Pucina adnymi razmovami. A admaŭlacca ad poŭnaŭładnaha kiravańnia ŭ Biełarusi Łukašenku, jak bačym, vielmi nie chočacca.
Samaje cikavaje, što ŭ samoj Rasii z pajezdkaj Łukašenki na paŭvostraŭ nie śpiašajucca — choć u Maskvie i zacikaŭlenyja ŭ tym, kab kiraŭnik choć jakoj-niebudź inšaj dziaržavy naviedaŭ akupavany ŭ 2014 hodzie paŭvostraŭ.
Ale, dumaju, Pucin vydatna razumieje, što za hetuju pajezdku jamu daviadziecca doraha zapłacić — i palityčnymi ŭstupkami, i realnymi hrašyma. I choča, kab Łukašenka daŭžej naprošvaŭsia ŭ Krym — tamu što čym daŭžej jon budzie prasić, tym mienš Kramlu daviadziecca jamu zapłacić za hetaje «padarožža».
«Maskva pravakuje kančatkovy razryŭ ekanamičnych adnosin pamiž Ukrainaj i Biełaruśsiu»
Alaksandr Kavalenka, błohier i vajenna-palityčny ahladalnik, piša na 24tv.ua:
«Skazać-ta skazaŭ, a dalej zajści słabo? Pryznańnie na aficyjnym uzroŭni, u vyhladzie ŭkaza, naprykład? A to słavabłudzić mohuć usie i ŭ MZS RB, i sam Łukašenka, ale patrebna aficyjnaja papierka.
A aficyjnaja papierka — heta ŭžo i adkaznaść, usie nastupstvy, asabliva — na mižnarodnym uzroŭni.
I voś ciapier samaje cikavaje. Alaksandr Łukašenka skazaŭ «a», ale nie śpiašajecca kazać «be». U pieršuju čarhu, jurydyčnaje «be».
Ci aśmielicca jon zajści dalej za banalnaje słavabłudździe albo instynkt samaabarony, banalny «žym-žym», voźmie vierch? Dumaju, što možna prymać staŭki».
Na tym ža partale žurnalist i błohier Dzianis Kazanski miarkuje, što Łukašenku dacisnuła Maskva:
«Maskva pravakuje kančatkovy razryŭ ekanamičnych adnosin pamiž Ukrainaj i Biełaruśsiu. Dziakujučy enierhietyčnamu kryzisu, Ukraina vymušana zakuplaje elektraenierhiju ŭ Biełarusi, i paśla takich zajaŭ pytańnie hetych zakupak zajhraje novymi farbami».
Čytajcie taksama:
«Pytańnie Kryma było kazyrnaj kartaj. Łukašenka vykłaŭ jaje, kab zapłacić Pucinu za važnuju pasłuhu». Palitołah pra schavanyja sensy hučnaj zajavy
