Što my słuchali ŭ lipieni i žniŭni — TOP-15 albomaŭ druhoj pałovy leta AŬDYJA
My pilna sačyli za relizami i skłali dla vas top z 15 najbolš značnych muzyčnych navinak, što pabačyli śviet u lipieni i žniŭni.
The Hatters — Forte & Piano
Hurt, jaki časta nazyvajuć «rasijskimi Gogol Bordello», u pieršy dzień lipienia vypuściŭ svoj čaćviorty albom, hučańnie jakoha było ščodra azdoblena kłavišnymi.
Što adnačasova dadała saŭndu «šlapnikaŭ» razynak i niepaŭtornaści, ale addaliła ich ad tradycyjnaha džypsi-pankaŭskaha drajvu i enierhietyki.
Nite Nite Nite — Blindspot
Adziny ajčynny reliz našaha topa. Minski hurt vypuściŭ debiutnuju płytku, dzieviać trekaŭ jakoj musiać dazvolić słuchaču zastupić u zabaronienuju liniju i adčuć čužyja strachi i psichozy, jakija nie chaciełasia b pieražyć samomu.
Darečy, videa na pieśniu SFMO zaniało dziaviaty radok u topie najlepšych biełaruskich klipaŭ minułaha hoda.
Cream Soda — Komieta
Dla prasoŭvańnia maładym rasijskim muzykam bolš nie patrebny televizar. Jość internet, jość jutub — hetaha dastatkova.
Naprykład, paśla vychadu alboma Cream Soda źniała klip na pieśniu «Nikakich bolšie viečierinok», jaki pahladzieli bolš za 3 miljony razoŭ.
Sabaton — The Great War
Šviedski hurt vydaje adzin za adnym pieśni i albomy na vajenna-histaryčnuju tematyku. The Great War staŭ dziaviatym u dyskahrafii Sabaton.
Reliz pryśviečany pieršaj suśvietnaj vajnie, jakaja musiła pakazać sapraŭdny tvar vojnaŭ i ich niedapuščalnaść u budučyni. Ale praŭda akazałasia zusim inšaj…
Kaiser Chiefs — Duck
Znajomyja z tvorčaściu Kaiser Chiefs tolki pa ich hałoŭnych chitach, zdajecca, buduć vielmi ździŭlenyja paśla prasłuchoŭvańnia ich novych piesień. Siońniašni saŭnd ciažka nazvać nie toje kab indzi, navat rokam.
Ale takoje voś raźvićcio. Jak kaža frantmen hurta Ryki Uiłsan, kali ich novyja pieśni nie źmieniać śviet, to niachaj buduć pryjemnym 40-chvilinnym saŭndtrekam da budzionnych spravaŭ.
Of Monsters And Men — Fever Dream
Ad isłandcaŭ nie było ničoha čuvać doŭhija čatyry hady, i jany viarnulisia z davoli ekśpierymientalnaj navinkaj.
Padčas stvareńnia novych piesień Nanie Chiłmarsdocir nadakučyła pisać pieśniu pad hitaru, i jana pačała vykarystoŭvać łeptop. Husty prychilnikaŭ OMAM padzialilisia, a vy na čyim baku?
Skillet — Victorious
Adzin z najbolš papularnych rok-hurtoŭ pradstaviŭ dziasiaty, jubilejny, reliz.
U im ŭ pryncypie mała što źmianiłasia: usio toj ža sakavity enierhičny saŭnd, matyvacyjnyja teksty i baraćba z unutranymi i źniešnimi demanami.
Stabilnaść — heta dobra, ale heta nie robić albom vybitnym.
Slipknot — We Are Not Your Kind
A voś Slipknot, u adroźnieńnie ad kaleh sa Skillet, stvaryli kali nie šedeŭr, to prynamsi vielmi blizka da jaho nablizilisia.
Hurt pasprabavaŭ rasšyryć miežy tradycyjnaha huku Slipknot, dadaŭšy ŭ jaho bolš instrumientału i kryšačku elektronnaj muzyki. Proma novaha alboma hurt pačaŭ z parački zabojnych sinhłaŭ, jakija vylilisia ŭ stanoŭčyja vynikovyja recenzii.
Adnaznačny must listen!
Bon Iver — i,i
Hałoŭnaj temaj alboma, jaki šmat chto nazyvajem relizam hoda, stała ŭsprymańnie śvietu i jaho ŭnutranaje adlustravańnie, adsiul i lustranaja łakaničnaja nazva alboma.
U zapisie alboma ŭziali ŭdzieł šmatlikija muzyki, u ich liku Aaron i Bryce Dessner z The National i łondanski śpiavak James Blake.
Taylor Swift — Lover
Jašče da aficyjnaha relizu novy albom Tejłar Śvift nabyli bolš za miljon razoŭ — fanaty čakali jaho dva hady.
Tejłar pastaleła — joj užo amal 30. Pamianiałasia jana sama, źmianiłasia i hramadstva, i ŭžo možno nie strymlivacca ŭ vykazvańni svajho mierkavańnia. Tamu, niahledziačy na roznyja vodhuki, Lover — adznaznačna najvažniejšy na siońnia albom śpiavački.
Brockhampton — Ginger
Kalektyŭ, viadomy źmiešvańniem chip-chopu z roznymi stylami, štohod raduje svaich prychilnikaŭ novymi albomami. Ginger mała padobny na letašniaha Iridescence i byŭ natchniony tvorčaściu Šai ŁaBafa, albomam piesień baptysckaj carkvy Mt. Olive z Džordžyi i trekam «Shit I'm On» DJ Muggs dy Roc Marciano.
Lana Del Rey — Norman F*****g Rockwell
Łana Del Rej — nie taja artystka, ad jakoj čakajuć kardynalnych źmien. Novy albom — usio tyja ž pavolnyja letuciennyja pieśni, sumnyja i nie vielmi.
Jany pryhožyja, stylovyja, atmaśfiernyja i pazačasavyja. Heta nie toj žanr, jaki spadabajecca absalutna kožnamu, zatoje fanaty i nieabyjakavyja buduć u zachapleńni.
Tarja — In The Raw
Voś užo 14 hod Tarja Turunien i hurt Nightwish ruchajucca roznym šlacham, i ŭvieś hety čas fanaty čakali ad śpiavački niečaha pa-sapraŭdnamu krutoha. Ale kožny papiaredni albom pakidaŭ niejkaje niezrazumiełaje pačućcio.
Nie ŭ hety raz! Było b łahična, kali b mienavita z takoha pačałasia solnaja karjera Turunien, ale dziakuj, što chacia b praz stolki hod nam nahadali, što takoje simfonik-mietał.
Tool — Fear Inoculum
Pieršy za 13 hod albom Tool daŭno paśpieŭ stać internet-miemam. Zdavałasia, što relizu nikoli ŭžo nie budzie, ale jon adbyŭsia i adrazu pačaŭ hramić rekordy papularnaści.
Tool — heta ŭsio taja ž «muzyka dla razumnych», ale amierykancy pačali rabić kroki nasustrač sučasnamu słuchaču. Ich albomy stali dastupnyja na stryminhavych płatformach.
The S.L.P. — The S.L.P.
Sierdžya Picorna z Kasabian zapisaŭ solny albom. Heta nie značyć, što hurt ź Lestera raspadajecca — jany jakraz pačali pracavać nad novym albomam, ale kali tak zachaciełasia Picorna, to čamu i nie?
Kali vam krychu nadakučyli Kasabian, to solnik S.L.P. — kłasnaja mahčymaść udychnuć śviežaha muzyčnaha pavietra.
Našy papiarednija ahlady:
