Spakuślivyja tancy i hienieratar bulby: 18 najlepšych klipaŭ biełaruskich vykanaŭcaŭ u 2018 hodzie VIDEA
«Naša Niva» praciahvaje padsumoŭvać vyniki 2018 hoda. Publikujem top z 18 klipaŭ biełaruskich vykanaŭcaŭ, što pabačyli śviet u adychodziačym hodzie.
18. PAWA — Dudaročku
Adkryvaje naš top iraničny klip pra žyćcio sučasnaha dudara ŭ kaściumie adydas. Skoki ŭ tralejbusie z kantraloram pad elektra-fołk, hopniki i luboŭnaja drama — usio heta možna znajści ŭ badziorym roliku.
17. Cima Biełaruskich — Mokryje krossy + Niezabudka
Na pačatku śniežnia novaja zorka biełaruskaj muzyki vydała klip adrazu na dva svaje chity. Publika acaniła: amal čatyry miljony prahladaŭ, ale niešta ŭ hetym videa nie tak.
Składvajecca ŭražańnie, što heta amatarskaja parodyja na klipy Maksa Karža. Ale kali ŭ aryhinał ty vieryš, bo bijahrafija Karža nie źjaŭlajecca tajamnicaj, to ŭ vypadku ź Cimaj Biełaruskich, zdajecca, ad imidžu «bedboja» ničoha nie zastaniecca, kali słuchačy daviedajucca praŭdu.
My ž budziem sačyć dalej.
Čytajcie taksama:
Cima Biełaruskich i jaho fanaty(-ki) VIDEA
Čamu «Biełaruskich» nie biełaruskaje proźvišča i ŭvohule aksiumaran
16. Mario Arrivederci — Riflessione
Nie śpiašajciesia sa svaimi «Štooo?!»
Napeŭna, bolš atmaśfiernaha i ramantyčnaha videa bolš nie budzie ŭ našaj padborcy. Tamu varta pahladzieć jaho jašče niekalki razoŭ, kab atrymać asałodu ad vytančanaj atmaśfiery, hitarnaha soła i zachodu sonca nad Śvisłačču.
15. Lera Jaskievič — Ruch
Ścipły, ale vielmi pryhožy klip na biełaruskamoŭnuju pieśniu maładoj biełaruskaj śpiavački.
Chaciełasia b pažadać u novym hodzie dla Lery skareńnia novych muzyčnych viaršyniaŭ i jašče bolš piesień na rodnaj movie!
Čytajcie taksama:
Ščyraja hutarka ź Leraj Jaskievič, jakaja rvie internet muzyčnymi kavierami, pra adkaznaść pierad aŭdytoryjaj, pravincyju i pakaleńnie błohieraŭ
«Tok» ź miehapapularnaj błohierkaj Leraj Jaskievič: Pra hałodnyja 2000-ja, žyćcio ŭ stalicy i šou Pierlina
14. Panska Moc — Ułybka
Debiutny klip hurta, jaki pazicyjanuje siabie muzykaj bietonnych minskich ścien. Ale Minsk u videa atrymaŭsia soniečnym i lampavym, jak u pryncypie i sama pieśnia, jakuju chočacca pastajanna napiavać.
13. Shuma — Clouds (Chmarki)
Siužet klipa zasnavany na realnaj historyi transhiendarnaj dziaŭčyny Valeryi Šandery.
Hetym videa Shuma chacieła padtrymać usich, chto źviedvaŭ na sabie hvałt za svaju inšaść, a taksama raspačać kampaniju pa padtrymcy baćkoŭ ŁHBT-dziaciej.
12. Drum Ecstasy — Happy Day
Pavučalny klip na kampazicyju, jakaja ŭjaŭlaje saboj tradycyjny ispanski tost. Liryčny hieroj videa pačynaje vypivać z pryhožymi dziaŭčatami, a ŭ kancy videa zamiest pryhažuń źjaŭlajucca suvoryja chłopcy.
Klip hurt zdymaŭ amal całkam svaimi siłami i vydatkavaŭ na jaho kala 500 dalaraŭ.
11. NAVIBAND feat. Melitina Staniouta — Rečańka
Hety hod byŭ vielmi nasyčanym dla ŭdzielnikaŭ kalektyvu: u Arcioma i Ksiušy naradziŭsia syn, niahledziačy na pryjemnyja kłopaty, NAVIBAND nie spynili muzyčnuju dziejnaść: aktyŭna hastraliravali, vydavali sinhły i zdymali klipy.
U 2018 hodzie ŭ hurta vyjšła adrazu try videa, ale nam by chaciełasia adznačyć mienavita «Rečańku» z udziełam Mieliciny Staniuty, bo jon byŭ pryśviečany Dniu rodnaj movy. Dy i heta prosta etałon vytančanaści, stylu i pryhažości.
10. ŁSP — Chołostiak
Papiaredžvajem: na videa jość niecenzurnaja łajanka!
Letam my pisali pra viasielle Aleha ŁSP, a ŭžo vosieńniu rasijskija chit-parady razryvaŭ trek «Chołostiak», zapisany biełarusam sumiesna ź Jahoram Krydam i Fiedukom.
U kastryčniku vyjšli adrazu dźvie viersii klipaŭ na hetuju pieśniu: ahulnaja i solnaja z udziełam Aleha Saŭčanki.
Varta adznačyć, što režysioram klipa stała Alina Piazak, ź jakoj źviazanyja najbolš papularnyja rasijskija videa apošniaha času.
9. Nite Nite Nite — SFMO
Pieršy klip minskaha hurta Nite Nite Nite — heta spakuślivy taniec sučasnaha mastactva pierad cnatlivym, ale cikaŭnym pozirkam hledača.
Hałoŭny hieroj videa — viciebski chareohraf i mastak Alaksiej Litvin. Charyzma Litvina trymaje vašu ŭvahu ad pieršaj da apošniaj siekundy klipa.
Taki voś Weapon of Choice pa-biełarusku.
8. NIZKIZ — Lusterka
U vynikach hodu «NN» nazvała mahiloŭski hurt muzykami hoda. NIZKIZ majuć svoj niepaŭtorny styl i ŭśled za biełaruskaj scenaj skarajuć najbližejšaje zamiežža.
Pieśnia raspaviadaje pra niekalki «ja», što žyvuć u kožnym čałavieku i ź jakimi prychodzicca suisnavać. A klip — heta historyja mužčyny, što znachodzicca ŭ biaskoncym cykle śnieńniaŭ, kožnaje prabudžeńnie ź jakoha daje jamu novuju nadzieju.
7. TT34 — Aerostaty
Pastupova lehiendarnyja homielskija mietalisty viartajucca z zabyćcia. U 2016 hodzie TT34 zapisali pieršy za doŭhi čas łonhpłej, a paśla hetaha pačali zdymać klipy na treki z alboma.
U hetym hodzie ŭ kamandy vyjšła adrazu dva videa: «Rodina» dy «Aerostaty». My vyrašyli adznačyć u našym topie druhi, jaki ŭjaŭlaje saboj «niamy śpiektakl, dzie za lalkami chavajucca ŭsim znajomyja vobrazy».
6. J:MORS — Kryły
U hetym hodzie biełarusy Alaksandr Cencier i Andrej Barysievič ablacieli na samalocie ŭvieś ziamny šar.
Kadry, adźniatyja lotčykami padčas padarožža, uvajšli ŭ klip na biełaruskamoŭnuju pieśniu J:MORS. Biełaruskija lasy, biaskrajniaja Atłantyka, amierykanskija prastory i pryhožaja muzyka — takim atrymaŭsia videašerah.
5. DREZDEN — DREZDEN
Siarhiej Michałok praciahvaje svaje tvorčyja ekśpierymienty.
Naprykancy leta źjaviŭsia debiutny albom novaha prajekta Michałka pad nazvaj DREZDEN, a taksama klip na adnajmiennuju pieśniu, jaki byŭ źniaty ŭ Kijevie.
Možna pa-roznamu stavicca da Michałka i jahonaj tvorčaści, ale muzyka nie źviartaje ŭvahi na krytyku i praciahvaje krucić piedali tvorčaha rovara.
4. Lavon Volski — Źnikłyja ludzi
Lavon Volski źbiraje hrošy na novy albom «Hravitacyja» i ŭžo paśpieŭ vypuścić dva klipy na pieśni z «Hravitacyi».
Pieśnia i klip, pa słovach Volskaha, raspaviadajuć pra admysłovy etap u žyćci kožnaha čałavieka, kali pastupova sychodziać siabry, znajomyja, rodnyja. Niejkija momanty nahadvajuć pra ich — miescy, rečy, słovy, muzyka, — a ich užo niama. I čym dalej, tym bolš takoha.
3. Maks Korž — Hory po koleno
Hałoŭny hieroj klipa daznajecca pra ciažarnaść svajoj dziaŭčyny i źbiahaje ad turbot razam z kampanijaj repiera na Kamčatku.
Nievierahodna pryhožyja piejzažy Dalokaha Uschodu pieramiažoŭvajucca z dušeŭnymi pakutami chłopca, jakomu sprabuje dapamahčy sam Korž.
Siońnia hety klip maje bolš čym 21 miljon prahladaŭ na YouTube, i heta samaje papularnaje videa našaha topa.
2. NIZKIZ — Niebiaśpiečna
Druhi klip muzykaŭ hoda pa viersii «NN» u našym topie i, biezumoŭna, najpryhažejšaje videa na biełaruskamoŭnuju pieśniu ŭ hetym hodzie.
Siužet klipa — baraćba čałavieka sa štučnym intelektam u listapadaŭskim lesie, na minskich dachach i navat pad vadoj. Štučnaje hulajecca z žyvym niby ź lalkaj, ale ci zmoža pieramahčy jaho?
1. Daj Darohu! — Pomohi!
Papiaredžvajem: na videa jość niecenzurnaja łajanka!
Razam ź sinhłam bresckija panki prezientavali 7-chvilinnuju karotkamietražku, dziejańni jakoj adbyvajucca ŭ niedalokaj budučyni i saŭndtrekam da jakoj idzie pieśnia «Pomohi!».
Videa raspaviadaje historyju biełaruskaha Pramieteja, jaki choć i nie padaryŭ ludziam ahoń, ale vynajšaŭ vielmi važny dla suajčyńnikaŭ aparat. Pahladzicie, što z hetaha atrymałasia.
A jakija klipy najbolš spadabalisia vam? Pišycie ŭ kamientarach!
