Budsłaŭski fest nie ŭnieśli ŭ śpis spadčyny JUNIESKA
Pytańnie ab uniasieńni ŭ Reprezientatyŭny śpis niemateryjalnaj kulturnaj spadčyny čałaviectva Budsłaŭskaha festu — śviata katolikaŭ Biełarusi ŭ honar abraza Maci Božaj Budsłaŭskaj — adkładzienaje.
Fota Siarhieja Hudzilina
Pra heta stała viadoma pa vynikach siesii Mižuradavaha kamiteta pa achovie niemateryjalnaj kulturnaj spadčyny JUNIESKA, jakaja prachodziła ŭ Adys-Abiebie ŭ Efiopii 28 listapada — 2 śniežnia.
Daśje budzie razhledžanaje ŭ nastupnym naminacyjnym cykle ŭ suviazi z zaŭvahami ekśpiertnaha savieta, jaki zapatrabavaŭ dadatkovuju infarmacyju, u pryvatnaści, ab mierach pa achovie tradycyi. Taksama ekśpierty paprasili bolš padrabiazna raskryć rolu pilihrymaŭ i miascovych žycharoŭ u invientaryzacyi i zachavańni hetaj kulturnaj kaštoŭnaści. Nahadajem, u Budsłavie — miastečku ŭ Miadzielskim rajonie Minskaj vobłaści — štohod u pačatku lipienia źbirajucca tysiačy pilihrymaŭ, mnohija ź jakich prychodziać pieššu z roznych kutkoŭ Biełarusi, dla ŭdziełu ŭ śviacie ŭ honar Panny Maryi.
Akramia Budsłaŭskaha festu, u nastupny raz Biełaruś pradstavić da zaniasieńnia ŭ śpis taksama staradaŭni abrad «Juraŭski karahod», jaki maje jak pahanskija, tak i chryścijanskija karani i prachodzić u vioscy Pahost Žytkavickaha rajona Homielskaj vobłaści, paviedamlaje biełaruskaja presa.
Siarod naminantaŭ, jakich u hety raz ŭnieśli ŭ śpis, — kultura piva ŭ Bielhii, śviata ahniu Faljas u ispanskaj Valensii, fiestyval rumby na Kubie, śviatkavańnie Novaha hoda ŭ Afhanistanie, Azierbajdžanie, Indyi i inšych azijackich krainach.
