Tvory Karatkieviča u dzień jaho narodzinaŭ čytali kala pomnikaŭ u Viciebsku, Oršy i ŭ Kijevie FOTA
Na 86-ja ŭhodki Uładzimira Karatkieviča da pomnikaŭ piśmieńniku ŭ Viciebsku, Oršy i Kijevie pryjšli prychilniki jaho tvorčaści, paviedamlaje Radyjo Svaboda.
Klasyk biełaruskaj litaratury naradziŭsia 26 listapada 1930 hodu ŭ Voršy. Ź Viciebskam jaho źviazvaje najpierš supracoŭnictva z Nacyjanalnym akademičnym dramatyčnym teatram imia Jakuba Kołasa — tut stavilisia pjesy pa jahonych tvorach.
Na kožnyja ŭhodki ludzi niasuć kvietki da jahonaha pomniku na vulicy Čechava ŭ Viciebsku. Sioleta sabrałasia kala dvuch dziasiatkaŭ čałaviek.
Jany prynieśli kvietki, adzin z aktyvistaŭ Chrystafor Žalapaŭ razharnuŭ bieł-čyrvona-bieły ściah. Prysutnyja pačytali vieršy klasyka, pradstaŭnik Tavarystva biełaruskaj movy Iosif Navumčyk padzialiŭsia asabistymi ŭspaminami pra znajomstva z Uładzimieram Karatkievičam.
Chrystafor Žalapaŭ niasie ściah
Taciana Sieviaryniec i Iosif Navumčyk
Sieleta, dziakujučy inicyjatyvie kaardynatarki pa stvareńni partyi BCHD Taciany Sieviaryniec, haradzkaja słužba ŽKH zrabiła tut ramont: adrestaŭravali prystupki, što viaduć da manumentu, i plitku vakoł jaho. Heta treba było zrabić na znak pavahi da piśmieńnika pierad jahonymi ŭhodkami, kaža spadarynia Taciana. A jašče j tamu, što ŭ apošnija niekalki miesiacaŭ hety pomnik staŭ znakavym haradzkim abjektam: tut źbiralisia pratestoŭcy suprać budaŭnictva ŭ Viciebsku kopii połackaha Safijskaha saboru.
***
Kala pomnika u aršanskim dziciačym parku prajšli tradycyjnyja litaraturnyja čytańni z udziełam siabroŭ litaraturnaha abjadnańnia «Dniaproŭskija hałasy».
***
U Kijevie kvietki da pomnika piśmieńniku ŭskłali pradstaŭniki kijeŭskaha BiełRazmoŭKlubu. Jany taksama začytali jahonyja vieršy.
Studenckija hady klasyka biełaruskaj litaratury prajšli va ŭkrainskaj stalicy. Jon vučyŭsia ŭ Kijeŭskim dziaržaŭnym universytecie imia Tarasa Šaŭčenki.
Ušanavańnie pamiaci Karatkieviča — tradycyjnaja štohadovaja akcyja BiełRazmoŭKlubu ŭ Kijevie.
