Film «U vajny nie žanočaje abličča» pavodle scenaryja Aleksijevič pakažuć u kinateatrach
Šmatsieryjny dakumientalny film «U vajny nie žanočaje abličča» pavodle scenaryja Śviatłany Aleksijevič płanujuć pakazać u biełaruskich kinateatrach. Pra heta na pres-kanfierencyi 15 śniežnia paviedamiła načalnik upraŭleńnia pa kiniematahrafii Ministerstva kultury Biełarusi Śviatłana Jaraševič.
Pavodle jaje słoŭ, sioleta film byŭ pieraviedzieny ŭ ličbavy farmat na kinastudyi «Biełaruśfilm» u ramkach stvareńnia ličbavaha filmatečnaha fondu i elektronnaha katałoha kiniematahrafičnych tvoraŭ minułych hadoŭ.
Na pytańnie, ci źviazanaja abličboŭka z prysudžeńniem Aleksijevič Nobieleŭskaj premii pa litaratury ŭ hetym hodzie, Jaraševič adkazała: «Heta adbyłosia da hetaj padziei. Čakajem paśla rehistracyi ubačyć film na ekranach našych kinateatraŭ».
Pry hetym jana padkreśliła, što pakaz filma ŭ kinateatrach zaležyć ad taho, jak buduć zaklučacca damovy na jaho prakat.
Jak adznačyŭ hienieralny dyrektar «Biełaruśfilma» Ihar Poršnieŭ, pierad kinastudyjaj staić zadača abličbavać staryja kinastužki, jakija «ŭjaŭlajuć peŭnuju kaštoŭnaść i karystajucca popytam». «U nas dakumientalny pakiet naličvaje bolš za 1,5 tysiačy nazvaŭ. Nie ŭsie jany mohuć vyklikać cikavaść, ale jak chronika, jak letapis času mohuć zacikavić. Ciapier my chočam bolš aktyŭna pracavać z našymi materyjałami», — rastłumačyŭ jon.
Dakumientalny film «U vajny nie žanočaje abličča» byŭ źniaty režysioram Viktaram Dašukom ŭ 1981-1984 hadach jašče da vychadu adnajmiennaj knihi Śviatłany Aleksijevič. Film raspaviadaje pra losy žančyn padčas Vialikaj Ajčynnaj vajny, u jaho asnovu lahli mahnitafonnyja zapisy hutarak Aleksijevič z hierainiami knihi.
