Stanisłaŭ Białkoŭski: Pucin uziaŭ kurs na źniščeńnie Ukrainy
Uładzimier Pucin pravakuje Piatra Parašenku admovicca ad zaŭtrašniaj sustrečy ŭ Miensku, śćviardžaje rasiejski palitolah Stanisłaŭ Białkoŭski.
U Miensku nia budzie anivodnaha lidera, jakoha rasiejski prezydent ličyŭ by roŭnym sabie, ułučna ź Piatrom Parašenkam, jakoha Pucin ličyć amerykanskaj maryjanetkaj, miarkuje ekspert.
Na 26 žniŭnia ŭ Miensku zaplanavanaja pieramovy ŭ farmacie «Ŭkraina — EZ — Mytny źviaz», u jakich voźmuć udzieł lidery krainaŭ i vysokija pradstaŭniki Eŭrapiejskaha źviazu. Prahrama pieramovaŭ dahetul nie viadomaja, adnak čakajecca, što pytańnie ŭkrainskaha kryzisu budzie abmiarkoŭvacca ŭsiebakova.
Radyjo Svaboda zapytała ŭ Stanisłava Białkoŭskaha, čaho čakać ad zaŭtrašniaj sustrečy ŭ Miensku.
Alaksandra Dyńko: Spadar Stanisłaŭ, sytuacyja mianiajecca z kožnaj chvilinaj. Litaralna niekalki hadzin tamu źjaviłasia infarmacyja pra ŭvarvańnie kalony rasiejskaj braniatechniki na terytoryju Ŭkrainy. Na fonie takich padziejaŭ ci čakać zaŭtra ŭ Miensku sustrečy lideraŭ dziaržavaŭ?
Stanisłaŭ Białkoŭski: Pakul niajasna, ci adbudziecca zaŭtra sustreča ŭ Miensku Ŭładzimiera Pucina ź Piatrom Parašenkam. Dla mianie ad pačatku było vidavočna, što nijakaha aptymizmu hetaja sustreča nie vyklikaje. Uładzimier Pucin pahadziŭsia na jaje, kab nie stvarać čarhovaj farmalnaj padstavy abvinavačvać jaho ŭ niedamovazdolnaści i niežadańni šukać šlachoŭ urehulavańnia ŭkrainskaha kryzisu.
Ale ŭ Miensku nia budzie anivodnaha lidera, jakoha Pucin ličyŭ by roŭnym sabie i hodnym abmiarkoŭvać los Ukrainy. Kali b tam byli Barak Abama ci Anhieła Merkiel, tady b Pucin moh razharnucca va ŭsioj svajoj krasie i paŭnacie.
Ja nia dumaju, što jon sapraŭdy choča abmiarkoŭvać los Ukrainy ź Piatrom Parašenkam, jakoha jon ličyć amerykanskaj maryjanetkaj. I nie vypadkova Pucin učora nie nakiravaŭ Parašenku vinšavańniaŭ z Dniom niezaležnaści Ŭkrainy.
Eskalacyja bajavych dziejańniaŭ z udziełam rasiejskaj vajskovaj techniki napiaredadni sustrečy ŭžo śviedčyć pra toje, ź jakim nastrojem Pucin choča prybyć u Miensk.
Ja nie vyklučaju, što Ŭładzimier Pucin admysłova spryjaŭ nahniatańniu napružanaści ŭ Łuhanskaj i Danieckaj abłaściach. U pryvatnaści, kontranastupu separatystaŭ i pierakidańniu tudy dadatkovaj techniki, kab spravakavać admovu Piatra Parašenki ad sustrečy. Hetaja admova była b aptymalnym dla Pucina vychadam z zaŭtrašniaj sytuacyi.
AD: Dosyć supiarečlivyja vyniki daŭ vizyt Anhieły Merkiel u Kijeŭ. Paabiacali 500 młn eŭra na adnaŭleńnie Danbasu, a ŭ toj ža čas vice-kancler Niamieččyny Zyhmar Habryel vykazaŭsia za federalizacyju Ŭkrainy. Paśla hetaha śpis patrabavańniaŭ Kramla da Ŭkrainy, jaki raniej niehałosna fihuravaŭ jak «plan Pucina», usio hučniej stali nazyvać planam «Pucina-Merkiel». Ci moža być tak, što nasamreč pieramovy pamiž Kramlom i kancylaryjaj Merkiel užo viaducca, i kali tak, to jakoha kštałtu damoŭlenaści mohuć pamiž imi być?
SB: Što tyčycca «planu Pucina-Merkiel», to, na moj pohlad, jaho nie isnuje. Ja nia vieru ŭ hetuju mitalohiju. Aktyŭnyja kansultacyi mahli vieścisia da padzieńnia małajzijskaha «Boinha», ale nie paśla jaho.
Idei, jakija byli ahučanyja Anhiełaj Merkiel u Kijevie 23 žniŭnia, nie źmiaščajuć u sabie ničoha novaha. Havorka idzie pra tyja zachady, jakija ŭžo i tak zroblenyja ci robiacca va Ŭkrainie. U pryvatnaści, pra nadańnie rasiejskaj movie aficyjnaha statusu na rehijanalnym uzroŭni. Ułasna, zakon, jaki praduhledžvaje hety status, tak zvany zakon Kaleśničenki-Kivałava, dziejničaje, jaho nichto nie admianiaŭ. Što tyčycca decentralizacyi, to adpaviednyja papraŭki da kanstytucyi Ŭkrainy prezydent Parašenka ŭžo ŭnios u parlament. To bok nie prapanoŭvajecca ničoha takoha, čaho b ukrainskija ŭłady ŭžo nie rabili.
Vizyt Merkiel u Kijeŭ nie pakazaŭ, što jość niejki sakretny pakt Berlina i Maskvy, u miežach jakoha los Ukrainy budzie vyrašacca za śpinaj hetaj dziaržavy. Jon pakazaŭ jašče raz (a heta taksama nijakaja nie navina), što Eŭropa nie źbirajecca ŭviazvacca ŭ vialikuju vajnu i vajavać za Ŭkrainu.
AD: Ci vy majecie na ŭvazie, što Pucin nasamreč ni z kim nie žadaje damaŭlacca i budzie nastojvać na svaich patrabavańniach, jakija ŭklučajuć aŭtanomiju Danbasu, niaŭstup Ukrainy ŭ NATO, damoŭlenaści z novaj uładaj pra haz dy inšaje?
SB: Uładzimier Pucin choča damaŭlacca ŭ pieršuju čarhu z Barakam Abamam, u druhuju — z Anhiełaj Merkiel. U samym skrajnim vypadku — z Fransua Alandam. Ale zachodnija lidery nie hatovyja da takich damoŭlenaściaŭ, bo adsutničaje ich papiaredni scenar. Ułasna, nijakija pieramovy pamiž Pucinym i zachodnimi liderami nia mohuć pačacca biez abmierkavańnia pytańnia pra status Krymu. A hetaje pytańnie Pucin abmiarkoŭvać nie źbirajecca.
Aproč taho, Zachad pa-raniejšamu nia choča pryznavać Pucina lehitymnym subjektam pieramovaŭ pra budučyniu Ŭkrainy ŭ cełym. Bo absalutna niajasna, čamu hetaje pytańnie pavinien vyrašać Pucin. Pucin ličyć akurat naadvarot: što jon subjekt takich pieramovaŭ, što budučyniu Ŭkrainy ŭ značnaj stupieni pavinien vyrašać jon.
I tut my bačym kanceptualny klinč, jaki pakul nie pieraadoleny.
Adnak Pucin absalutna vidavočna ŭziaŭ kurs na źniščeńnie Ŭkrainy, jak šlacham eskalacyi vajennaha kanfliktu i ŭsio bolšaj padtrymki separatystaŭ u Danieckim i Łuhanskim rehijonach, tak i šlacham stvareńnia Ŭkrainie dadatkovych ekanamičnych ciažkaściaŭ. Jon ličyć, što sukupnyja prablemy, ź jakimi sutykniecca Ŭkraina da zimy ci da viasny, tak ci inakš prymusiać Kijeŭ pajści na pieramovy na pucinskich umovach. Choć hetyja pieramovy buduć vieścisia nie naŭprost ź Piatrom Parašenkam, a, u razumieńni Pucina, z zachodnimi liderami, jakija musiać dać peŭnyja harantyi za Kijeŭ.
AD: I jakaja, u vašym razumieńni, kančatkovaja meta jahonych dziejańniaŭ?
SB: Pucin damahajecca vialikaj źniešniepalityčnaj pieramohi va Ŭkrainie. Pryčym treba razumieć, što Ŭkraina dla jaho — nie paŭnavartasnaja prastora, a nahoda dla razmovy z Zachadam pra jaho, Uładzimiera Pucina, rolu i miesca ŭ sučasnaj historyi i adzinym padručniku historyi. Jon pa-raniejšamu ličyć, što jon zmoža dabicca federalizacyi Ŭkrainy, padvyšeńnia statusu rasiejskaj movy, ćviordych i vyraznych harantyjaŭ pazablokavaha statusu hetaj krainy.
Ale dla taho kab urešcie prymusić zachodnich kontrahientaŭ pajści na pieramovy, treba spačatku ŭsio sapsavać. Naprykład, zavieści sytuacyju va Ŭkrainie maksymalna ŭ tupik, čym jon ciapier i zajmajecca.
Jon choča dać zrazumieć: kali vy, pavažanyja zachodnija lidery, nia chočacie vieści sa mnoj pieramovy pra los Ukrainy, nie pryznajacie mianie paŭnavartasnym subjektam takich pieramovaŭ, to ja zrablu Ŭkrainie takija prablemy, što vy budziecie vymušanyja na hetyja pieramovy pajści.
