У Пастаўскім раёне застрэліўся салдат тэрміновай службы
25 сакавіка ў Пастаўскім раёне загінуў вайсковец тэрміновай службы Мікіта Літвіновіч, даведалася «Люстэрка». Паводле інфармацыі крыніц выдання, ён здзейсніў суіцыд. Хлопца пахавалі 27 сакавіка ў Паставах.
Мікіта Літвіновіч. Фота: vk.com
Літвіновіч служыў памочнікам гранатамётчыка 19-й асобнай гвардзейскай механізаванай брыгады, дыслакаванай у вёсцы Заслонава Віцебскай вобласці. У сярэдзіне сакавіка брыгаду адправілі бліжэй да літоўскай мяжы ў рамках праверкі боегатоўнасці.
«Камандзіры не паведамілі бацькам ніякіх падрабязнасцяў. Бацьку ўдалося толькі даведацца, што разам са сваімі калегамі Мікіта «прыехаў на пункт», выйшаў пакурыць і застрэліўся», — расказала выданню крыніца.
Са слоў суразмоўцы, перадумоў да самагубства ў Мікіты не было, ён «заўсёды трымаўся на пазітыве».
Мікіта Літвіновіч нарадзіўся ў 2003 годзе ў Паставах. У 2022 годзе скончыў Пастаўскі дзяржаўны каледж па спецыяльнасці «тэхнічнае забеспячэнне сельскагаспадарчых работ. Эксплуатацыя і рамонт аўтамабіляў». Восенню 2022 года яго прызвалі ў армію.
Чытайце таксама:
У Ельскім раёне скончыў жыццё самагубствам 20-гадовы памежнік
Стала вядома пра яшчэ адзін нядаўні суіцыд беларускага салдата, гэтым разам памежніка
