«Ну, так ужо і пасадзяць! Разбяруцца!» Андрэй Павук расказаў, як тэлефанаваў у Следчы камітэт адносна завочнага суда
18 сакавіка стала вядома, што СК пачаў спецвытворчасць па палітычных крымінальных справах у дачыненні да 11 беларусаў. Сярод іншых у спісе таксама блогер Андрэй Павук, на рахунку якога ажно 11 крымінальных артыкулаў, і ягоная былая жонка Вольга. У каментары «Люстэрку» Павук расказаў, як ён адрэагаваў на навіну, і спрабаваў даведацца падрабязнасці ў прадстаўнікоў пракуратуры і Следчага камітэта.
Андрэй Павук. Фота: facebook.com/andreypavuk
«Расцэньваю гэта як іх бездапаможнасць»
«Я якраз абзвоньваў пракуратуру, СК, спрабаваў даведацца, хто па мне прызначаны следчым», — адказаў па тэлефоне Андрэй на просьбу «Люстэрка» пракаментаваць сітуацыю са спецвытворчасцю.
Падрабязнасці блогер паспрабаваў даведацца ў супрацоўнікаў СК Брэсцкай вобласці, які пачаў працэдуру.
«Я тэлефанаваў у канцылярыю — яны не ведаюць, хто такі Павук. Следчаму тэлефанаваў (знайшоў нумар на «карце даносаў»). Ён таксама не ведае, хто я такі. Я спрабаваў справакаваць іх на нейкія эмоцыі. Ну, жанчына пахіхікала, — пераказвае ён размову. — Кажу: Я ж магу праз скайп прысутнічаць на судзе, даць тлумачэнні якія-небудзь — хачу прапанаваць такую ідэю. Але мне сказалі, што трэба пісьмова пісаць такое хадайніцтва — проста на паперках, і ўсё, па-іншаму нельга».
«Не буду з вамі на гэтую тэму дыскутаваць»
Андрэй Павук перадаў «Люстэрку» запіс размовы з супрацоўніцай канцылярыі ўпраўлення СК па Брэсцкай вобласці. Жанчына сапраўды прапанавала мужчыну даслаць ліст з хадайніцтвам правесці допыт па спецвытворчасці ў дачыненні да яго ў канверце па пошце.
— Па тэлефоне такія пытанні не вырашаюцца, — сказала яна. — Ні праз адзіную сістэму зваротаў, ні праз электронныя звароты — толькі хадайніцтва на ўпраўленне СК па Брэсцкай вобласці. Апісваеце сітуацыю і пішаце: «Прашу мяне дапытаць з выкарыстаннем Viber, Skype ці чаго вы там жадаеце». У нас (на жаль ці на шчасце) электронная пошта для такога віду зваротаў не прадугледжаная. Па КПК хадайніцтвы, скаргі падаюцца толькі ў пісьмовым выглядзе, нават калі вы за мяжой. У нас з-за мяжы вельмі шмат [зваротаў паступае] — з Польшчы, Амерыкі шлюць, і пытанняў няма. Дык а чаму вы не хочаце [асабіста] прыбыць? Ну, так ужо і пасадзяць! Разбяруцца! — сказала яна на словы суразмоўцы, што яго адразу затрымаюць.
— Пасадзяць па-любому. Мне сам Карпянкоў асабіста пагражаў: «Я не ведаю, што з табой зраблю, калі мы цябе знойдзем», — адрэагаваў Павук.
— А хто такі Карпянкоў?
— Мікалай Мікалаевіч, гэты, самы мацёры міліцыянт, — растлумачыў супрацоўніцы ведамства Павук, кажучы пра камандуючага ўнутранымі войскамі, намесніка міністра МУС.
Блогер паспрабаваў даведацца прозвішча следчага, які займаецца яго матэрыяламі. Аднак выявілася, што супрацоўніца ўправы не ведала пра той самы тэлеграм-канал «Спецыяльная вытворчасць. Афіцыйна», у якім з'явілася навіна пра Павука і іншых беларусаў і праз які, верагодна, ведамства апавяшчае тых, хто з'ехаў.
Пасля блогер стаў тлумачыць, чаму трапіў у поле зроку органаў, і паспрабаваў уцягнуць суразмоўніцу ў размову пра тое, што адбываецца ў краіне.
— Ведаеце, чаму яны хочуць мяне пасадзіць? Гэта ж я таксама хачу заканадаўства памяняць, усім нагадваю пра тое, пра гэта, дык яны мяне: «Ах, ты экстрэміст, не хочаш Лукашэнку любіць, мы цябе пасадзім».
— Не буду з вамі на гэтую тэму дыскутаваць, — уздыхнула супрацоўніца СК.
— Вось бачыце, якія наступствы могуць наступіць, калі дыскутуеш на гэтую тэму! Гэта ж дажыліся!
— Ну, дажыліся. Ну, што ж… — пасмяялася суразмоўца ў адказ.
— Гэта ж з вашага ж маўчання. Я ж кажу [публічна пра парушэнні з боку ўлады], а вы маўчыце — выконваеце [цяперашнія законы і прадпісанні].
— Так, выконваю.
— Зразумела, што вас таксама могуць пасадзіць, калі вы не будзеце маўчаць. І мы толькі і можам — што з-за мяжы, — працягнуў размову Андрэй. — І сесці ў турму не хочам, і кіраваць краінай хочам з дапамогай таго заканадаўства, якое ў нас ёсць, а нічога не працуе. А вось як пасадзіць у турму — гэта будзь здароў! Сам Лукашэнка не выконвае тое заканадаўства — і ніхто яго не хоча пасадзіць, а мяне адразу хочуць. Вось там экстрэмізм дык экстрэмізм — у той галаве вусатай!
— Давайце мы ўжо не будзем на гэтую тэму дыскутаваць … — паўтарыла суразмоўца. — Без каментароў, прабачце ўжо.
Чытайце таксама:
Дабравольскаму, Ліберу і Жываглод завочна прысудзілі па 4 гады за зрыў рэферэндума
Завочна будуць судзіць Ляўчук, Павукоў, Вераніку Цапкалу
Хто муж Вольгі Бондаравай? Выглядае, што працуе кіроўцам у Еўрасаюзе
