У 21-гадовага хлопца выцягнулі ў маршрутцы з заплечніка ўсе грошы, заробленыя ў Расіі
У аператыўна-дзяжурную службу Івацэвіцкага РАУС звярнуўся 21-гадовы жыхар горада Косава. Ён расказаў, што невядомы, знаходзячыся ў маршрутцы «Мінск—Пінск», каля Мінска выцягнуў у яго з заплечніка 170 тысяч расійскіх рублёў (каля 2 тысяч даляраў).
Фота: Новы Калінінград
Са слоў пацярпелага, напярэдадні ён вяртаўся дадому з заробкаў з Расійскай Федэрацыі і вёз з сабой заробленыя грошы ў заплечніку. Па вяртанні дадому малады чалавек заўважыў адсутнасць грошай і пайшоў у міліцыю.
Супрацоўнікі Івацэвіцкага РАУС устанавілі, што да крадзяжу датычны 20-гадовы жыхар Стоўбцаў, які ехаў той жа маршруткай. У гутарцы з міліцыяй малады чалавек растлумачыў, што грошы ён запрыкмеціў падчас таго, як пацярпелы разлічваўся з кіроўцам за праезд, дачакаўся моманту, калі апошні пакінуў заплечнік з грашыма без увагі, і забраў іх сабе.
Пазней грошы ён абмяняў на беларускія рублі і патраціў на асабістыя патрэбы. Распачата крымінальная справа за крадзеж.
