У Радзе бяспекі Беларусі не выключылі размяшчэння ў Таджыкістане вайскоўцаў АДКБ з-за сітуацыі ў Афганістане
Такое меркаванне выказаў дзяржсакратар Рады бяспекі Беларусі Аляксандр Вальфовіч у артыкуле, апублікаваным у чацвер у газеце «СБ. Беларусь сегодня».
Ён падкрэсліў, што падзеі ў Афганістане могуць прывесці да росту транснацыянальных выклікаў і пагроз.
«Далейшае абвастрэнне і непрадказальнасць абстаноўкі не выключаюць у тым ліку прыняцця рашэння аб размяшчэнні вайсковых кантынгентаў дзяржаў — членаў Арганізацыі [уваходзяць Расія, Беларусь, Арменія, Казахстан, Кыргызстан] на тэрыторыі Таджыкістана ў мэтах аховы таджыкска-афганскай мяжы ў складзе калектыўных сіл хуткага разгортвання Цэнтральнаазіяцкага рэгіёна калектыўнай бяспекі і Калектыўных сіл аператыўнага рэагавання АДКБ», — адзначыў А. Вальфовіч.
Паводле яго слоў, неабходна «рабіць дадатковыя намаганні па ўмацаванні дыпламатычных і ваенна-палітычных адносін у рамках Саюзнай дзяржавы, АДКБ, ШАС, а таксама ў двухбаковым фармаце з іншымі замежнымі партнёрамі».
