Bieł-čyrvona-biełyja ściahi pobač z čyrvona-zialonymi ŭ Chielsinki (foty)
Na biełaruskija matčy źlatajucca surodzičy ź Finlandyi, Estonii i Piciera.
Hulnia biełaruskaj kamandy nie raduje, ale biełarusy ŭsio adno źjazdžajucca, kab padtrymać svaich. Na matčy Biełaruś-Francyja zaŭziatary vitali zbornuju jak aficyjnymi, tak i nacyjanalnymi ściahami.
Siarod fanataŭ ź bieł-čyrvona-biełymi ściahami byŭ hamialčuk Ihar Słučak, aŭtar idei «Spravavodstva pa-biełarusku». Chłopiec vučycca ŭ Estonii. U Chielsinki pryjechaŭ na paromie z Talina.
Ihar daŭno maryŭ trapić na Čempijanat śvietu pa chakiei.A matč Biełaruś-Francyja 14 maja vybraŭ admysłova. U hety dzień u 95-m hodzie nacyjanalnyja hierb i ściah byli zamienienyja savieckaj simvolikaj.
Siarhiej, biełarus ź Piciera, i jaho siabar Viktar pryjechali ŭ Chielsinki na niekalki matčaŭ z udziełam našaj zbornaj. Siarhiej rodam ź Bieraściejščyny, apošnija 8 hadoŭ žyvie ŭ Rasii, ale radzimu nie zabyvaje.Chadziŭ na kancert «Lapisaŭ» u Piciery, a zaraz voś pryjechaŭ padtrymać našych nacyjanalnym ściaham.
Na stadyjonie niepadaloku ad jaho siadzieŭ staršynia Fiederacyi chakieja Biełarusi Jaŭhien Vorsin. Siarhiej sfatahrafavaŭsia razam ź im. Ale
Vorsin nie chacieŭ, kab u kadr trapiŭ b-č-b ściah, «kab nie padumali, što jon «z našych», śmiajecca picierski biełarus.
Adnak bolš za ŭsio bieł-čyrvona-biełych ściahoŭ było ŭ… finskich chłopcaŭ i dziaŭčat, miascovych demakratyčnych aktyvistaŭ. Ściahi jany pašyli na zakaz.
Aproč ściahoŭ prynieśli płakaty «Free Belarus» («Volnaja Biełaruś»), «Lukashenka resign» («Łukašenka, idzi ŭ adstaŭku») dy b-č-b akulary.
U pieršym tajmie finy siadzieli asobna. U pierapynku ich adšukali biełaruskija zaŭziatary, i reštu hulni jany siadzieli razam.
Našy zaŭziatary jak z čyrvona-zialonymi, tak i ź bieł-čyrvona-biełymi ściahami, kryčali pa-biełarusku «Biełarusy - nazaŭždy!» i «Nam treba hoł!». Adnak na vynik hulni heta, na žal, nie paŭpłyvała.
