Pieratrusy ŭ žurnalistaŭ «NN»: u fatohrafa Julii Daraškievič i videaapieratarki Taćciany Haŭrylčyk
Supracoŭniki KDB prademanstravali viedańnie zapisaŭ Ju.Daraškievič u Fejsbuku.
Ranicaj 31 śniežnia prajšoŭ pieratrus u fatohrafa «Našaj Nivy» Julii Daraškievič.
U kvateru, dzie žyvie Ju.Daraškievič razam sa svaim mužam Paŭłam Juchnievičam, pahrukali, a
Jula i Pavieł zrazumieli, što heta niapraŭda, ale vyrašyli adamknuć. «Tady b jany prosta vyłamali b dźviery», — kaža Jula.
Zajšli supracoŭniki KDB, pakazali order na viadzieńnie kryminalnaj spravy ab masavych biesparadkach u Minsku viečaram 19 śniežnia. Order byŭ vypisany na proźvišča Daraškievič.
Zajavili, što ŭ Ju.Daraškievič mohuć być fota i videamateryjały,
jakija źjaŭlajucca dokazami ŭ hetaj spravie, a taksama nakont spravy, jakaja tyčycca zryvańnia dziaržaŭnaha ściaha z budynka KDB.
Jula zajaviła, što na Kastryčnickaj płoščy viečaram 19 śniežnia nie była i ŭ šeści pa praśpiekcie Niezaležnaści nie ŭdzielničała, pakolki ŭ toj čas znachodziłasia ŭ ofisie «Havary praŭdu» na Niamizie i pryjšła tolki na Płošču Niezaležnaści.
Pieratreśli dva pakoi i kuchniu — Pavieł i Julija tolki niadaŭna pierajechali na novuju zdymnuju kvateru, tamu mnohija rečy tak i zastalisia nieraspakavanymi, pieratresiena było ŭsio.
Kanfiskavali dva noŭtbuki, usie fłeški, dyktafon, vynasnyja vinčestary, dyski, navat dysk z mastackim filmam «Chodiat słuchi» — usiaho 15 nośbitaŭ infarmacyi.
Supracoŭniki KDB prademanstravali viedańnie zapisaŭ Ju. Daraškievič u Fejsbuku.Niadaŭna Jula pisała, što jany chodziać na pieratrusy pa viečarach. Vyrašyli pakazać joj, što mohuć pryjści i ranicaj.
Byŭ taksama zatrymany jaje muž, hramadski aktyvist Pavieł Juchnievič,
jaho advieźli va ŭpraŭleńnie KDB pa horadzie Minsku (Kazłova, 6), zaznačyŭšy, što Pavieł budzie dapytany ŭ jakaści śviedki.
Paźniej stała viadoma, što jaho pieravieźli ŭ Maskoŭski RUUS. Tam na jaho skłali pratakoł za ŭdzieł u manifiestacyi 19 śniežnia, a paśla pieravieźli ŭ turmu na Akreścina, bo sudy siońnia nie pracujuć. Novy hod jon, imavierna, praviadzie ŭ kamiery.
Taksama łamilisia ŭ kvateru, dzie žyvie videapieratar NN Taciana Haŭrylčyk.
Ale jana śpiarša nie puściła ich u chatu. «Nieviadomyja» patorhali klamku i syšli. Potym viarnulisia znoŭ.
Ciapier u kvatery Taćciany Haŭrylčyk idzie pieratrus, jaje telefon nie adkazvaje.
* * *
Pieratrus u Haŭrylčyk skončyŭsia kala 15.20. U jaje zabrali videakamieru, kampjutar i fłeški, jakija znajšlisia ŭ kvatery.
* * *
Julija Daraškievič -- fatohraf NN ad 2003 hoda. Łaŭreat mižnarodnych premij, aŭtarka piersanalnych vystaŭ u roznych krainach Jeŭropy i haradach Biełarusi. Jaje fotarepartažy možna pabačyć tut.
Videaadździeł NN zrabiŭ unikalnyja videa ŭ časie padziej 19 śniežnia. Ahułam za apošnija 12 dzion ich prahledzieli bolš za 1,100,000 razoŭ.
