Urad Čechii raskryŭ bujnuju rasijskuju apieracyju ŭpłyvu ŭ krainach ES
Jeŭrapiejskija palityki atrymlivali ad Rasii sotni tysiač jeŭra.
Ab raskryćci dziejnaści sietki ŭpłyvu, jakaja dziejničała ŭ Čechii i finansavałasia Rasijaj, zajaviŭ premjer-ministr Piotr Fiała (Petr Fiala). Dakumienty ab hetym pradstaviła kontrraźviedka krainy.
U centry apieracyi ŭpłyvu, jak śćviardžaje češski ŭrad, znachodziŭsia navinavy sajt «Hołas Jeŭropy». Na im u šmatlikich intervju vykazvajucca jeŭrapiejskija palityki, jakija vyznačajucca pravapapulisckimi i pravaekstremisckimi pohladami.
Pa infarmacyi Der Spiegel, hrošy palitykam z Hiermanii, Francyi, Polščy, Bielhii, Niderłandaŭ i Vienhryi pieradavalisia jak padčas asabistych sustreč u Prazie, tak i šlacham pieravodu kryptavaluty. Havorka idzie pra niekalki socień tysiač jeŭra.
Pa infarmacyi vydańnia, u vykryćci rasijskaj apieracyi ŭpłyvu prymali ŭdzieł śpiecsłužby niekalkich krain.
27 sakavika češski ŭrad unios kampaniju, jakoj naležyć «Hołas Jeŭropy», jaje mierkavanaha ŭładalnika Viktara Miedźviedčuka (jakoha miedyja nazyvajuć «kumam Uładzimira Pucina») i dyrektara Arcioma Marčeŭskaha ŭ sankcyjny śpis. Jak śćviardžajecca, mienavita Marčeŭski, jaki raniej byŭ pradziusaram telekanała «112 Ukraina», što naležaŭ Miedźviedčuku, zjaŭlajecca faktyčnym kiraŭnikom «Hołasu Jeŭropy».
Češski ŭrad śćviardžaje, što Miedźviadčuk i jaho davieranaja asoba Marčeŭski vykarystoŭvali «Hołas Jeŭropy» ŭ niekalkich krainach ES «dla tajnaha akazańnia finansavaj padtrymki abranym asobam siarod kandydataŭ na vybarach u Jeŭraparłamient». Siarod metaŭ — «spryjańnie prapahandysckaj dziejnaści», nakiravanaj suprać Ukrainy.
Sajt «Hołas Jeŭropy» byŭ zapuščany ŭ červieni 2023 hoda. Naviny na im vypuskajucca na bolš čym 10 movach, uklučajučy ruskuju. Anhłamoŭny telehram-kanał z anałahičnaj nazvaj maje kala 1500 padpisčykaŭ.
Jak adznačaje vydańnie, z zajavy češskich uładaŭ zastajecca niezrazumiełym, jakim mienavita čynam Miedźviadčuk kantralavaŭ sajt i kampaniju, jakaja, adpaviedna češskamu Handlovamu rejestru naležyć hramadzianinu Polščy Jacaku Jakubčyku. Nieviadomyja i imiony palitykaŭ, jakija atrymlivali hrošy.
Čytajcie jašče:
Na ruinach «pryhožynskaj impieryi trolaŭ» u Rasii stvaryli «suśviet trolaŭ». Jak jon dziejničaje?
