«Treba spytać u Sachaščyka, adkul jon vałodaje takoj infarmacyjaj». Ekśpiert pra rezanansnuju zajavu pradstaŭnika APK
Vilnia i Varšava «ŭpisany ŭ kaardynaty» rasijskaj taktyčnaj jadziernaj zbroi, ale razam z tym jość pytańnie, nakolki hetuju zbroju mohuć i buduć vykarystoŭvać, zajaviŭ u kamientary »Pozirku» palitołah, śpiecyjalist pa pytańniach nacyjanalnaj biaśpieki Alaksandr Kazak.
Alaksandr Kazak. Skryn videa
Kamientujučy vykazvańni pradstaŭnika Abjadnanaha pierachodnaha kabinieta (APK) pa abaronie i nacyjanalnaj biaśpiecy Valeryja Sachaščyka, jaki zajaviŭ, što Rasija i Biełaruś rychtujuć płany vykarystańnia jadziernaj zbroi i «niejkaha blickryhu na Vilniu», ekśpiert adznačyŭ, što takija zajavy mahli być vyklikanyja, «pa-pieršaje, situacyjaj ź Biełaruśsiu, jakuju treba viartać u infarmacyjny kantekst i dyskurs».
«Pa-druhoje, treba spytać u Sachaščyka, adkul jon vałodaje takoj infarmacyjaj, kab zrazumieć, ad kaho heta zychodzić, ale nie majučy na ŭvazie, što jon moža chłusić, — padkreśliŭ Kazak. — Znoŭ ža, Paŭnočnaja Kareja, mabyć, taksama buduje płany napadaŭ na Paŭdniovuju, płanuje vajnu z ZŠA i supracoŭničaje z Rasijaj. Tamu absalutna narmalna, što Biełaruś i RF majuć peŭnyja płany, dzie kaho atakavać i čym bambić».
Na dumku surazmoŭcy, stalicy Litvy i Polščy, choć i ŭpisany ŭ kaardynaty TIAZ, pieradumoŭ jaje vykarystańnia «amal niama».
«Idzie treci hod poŭnamaštabnaha ŭvarvańnia va Ukrainu, i, kaniečnie, byli idei, ale nie było fakta vykarystańnia padobnaj zbroi, karystalisia niečym inšym. Ci budzie jadzierny ŭdar pa krainach NATA? Ja nie dumaju», — skazaŭ surazmoŭca.
Pa słovach ekśpierta, u kantekście mahčymaj vajny z NATA vielmi važna karystacca vopytam Ukrainy: «My pamiatajem, što była pierakidka vojskaŭ i potym adbyłosia ŭvarvańnie».
«Taksama byŭ parohavy momant adnosna mahčymaści vajny», — nahadaŭ Kazak, majučy na ŭvazie evakuacyju z Ukrainy dypłamataŭ ZŠA, Rasii, inšych krain, a taksama siemjaŭ vajennych napiaredadni poŭnamaštabnaha ŭvarvańnia. «Tamu niešta padobnaje pavinna adbyvacca i ŭ vypadku mahčymaha napadu na krainy NATA. Praciŭnik vučycca, i nie varta jaho niedaaceńvać. Niama devalvacyi mahčymaściaŭ rasijskich vajskoŭcaŭ unutry NATA. Lepš padrychtavać svajo nasielnictva, pakazać, što my hatovy, padrychtavany, pasprabujcie, kali vy takija mocnyja i ambicyjnyja», — padsumavaŭ ekśpiert.
Ab płanach vykarystańnia Rasijaj i Biełaruśsiu jadziernaj zbroi i padrychtoŭcy napadu na Vilniu Valeryj Sachaščyk zajaviŭ 24 sakavika ŭ Varšavie na mitynhu z nahody Dnia Voli.
«Ja heta dakładna viedaju», — skazaŭ jon, dadaŭšy, što «biełaruskija hienierały sa svaimi kalehami z Maskvy malujuć strełki na kartach u bok Vilniusa».
Pavodle słoŭ Sachaščyka, ułady Rasii i Biełarusi spadziajucca, što «cyvilizavany śviet budzie šakiravany» takoj eskałacyjaj ahresii i «spynić supraciŭleńnie».
Vykarystańnie jadziernaj zbroi i napad na Litvu Maskva i Minsk płanujuć z-za niaŭdač u vajnie z Ukrainaj, vykazaŭ mierkavańnie pradstaŭnik APK.
14 sakavika amierykanskaje vydańnie Foreign Policy paviedamiła , što Rasija pieramiaściła taktyčnuju jadziernuju zbroju ad svaich miežaŭ u Biełaruś, «na niekalki sotniaŭ mil bližej da terytoryi NATA».
Sa spasyłkaj na «zachodnich čynoŭnikaŭ» śćviardžałasia, što heta adbyłosia, bo «rasijski prezident Uładzimir Pucin pahražaje šyrejšymi vajskovymi sutyknieńniami z aljansam z-za jaho stałaj padtrymki Ukrainy».
Fiederacyja amierykanskich navukoŭcaŭ (FAS), spasyłajučysia na ŭciečku dakumientaŭ sa spravazdačy CRU, zajaviła ab «niadaŭniaj madernizacyi vajskovaha składa ŭ centralnaj Biełarusi».
Pavodle infarmacyi FAS, terytoryja składa była asnaščana «dadatkovymi pierymietrami biaśpieki i punktam dostupu na jaho vierahodnaje pryznačeńnie dla raźmiaščeńnia rasijskich jadziernych bojehałovak dla pastaŭlenych Biełarusi rakietnych ustanovak «Iskander».
Adznačałasia, što na spadarožnikavym zdymku, pradstaŭlenym kampanijaj Maxar Technologies, bačnaja častka depo kala Asipovičaŭ, jakaja była z taho času taksama madernizavanaja i abstalavanaja pierymietram biaśpieki z čatyroch aharodž i krytaj achoŭnaj kropkaj dostupu. U abnoŭlenym depo «Asipovičy» pierymietr achovy pavialičany ŭ čatyry razy.
4 lutaha načalnik uzbrajeńnia Uzbrojenych sił Biełarusi Andrej Fiedzin zajaviŭ, što raźmiaščeńnie ŭ krainie rasijskaj taktyčnaj jadziernaj zbroi — «vielmi važki faktar stratehičnaha strymlivańnia».
Čytajcie taksama:
Łukašenka adkazaŭ Sachaščyku: Poŭnaja duraść
Ułady Rasii i Biełarusi rychtujuć vykarystańnie jadziernaj zbroi i «blickryh na Vilniu» — Sachaščyk
Pamieranski špic Umka zasłuchaŭ, jak biełaruskija hienierały źbirajucca supraćstajać Zachadu FOTA
I va Ŭkrainie jadravy šantaž peŭny čas pracavaŭ, z-za čaho Zachad vielmi aściarožna naroščvaŭ kolkaść i namienkłaturu zbroi, jakaja pradstaŭlałasia Ŭkrainie. U vyniku paśla vyzvaleńnia Chiersona z-za niedachopu nastupalnych srodkaŭ ZSU pastupova stracili stratehičnuju inicyjatyvu, kontrnastup nie daŭ istotnych vynikaŭ, a vajna pierajšła ŭ akopny farmat. Ale heta ŭsio roŭna była vielmi niebiaśpiečnaja situacyja dla rasiejcaŭ, bo miasnyja ataki stočvajuć ichnuju armiju, a pavialičeńnie mižnarodnaj dapamohi Ŭkrainie jak i raniej zdolnaje źmianić situacyju.
Tady adbyłasia sproba Kramla padšturchnuć Iran mocna raspalić staryja kanflikty - u Palestyni i ŭ Jemieni.
Ale hetaha zdajecca niedastatkova, i zaraz Kreml moža razhladać jadravy šantaž, ale ŭ hety raz užo z kaštoŭnymi dla zachadu zakładnikami - hramadzianami JEZ. I raptoŭny zachop pa sutnaści pamiežnaj Vilni i imklivaje raźmiaščeńnie tam jadravaj sbroi za žyvym ščytom ź niekalkich socien tysiač hramadzian JEZ mocna ŭzmacniaje pieramoŭnuju pazicyju pucina ŭ adnosinach z zachadam. Navat bieź jadravaj ataki na NATA.