«Трэба спытаць у Сахашчыка, адкуль ён валодае такой інфармацыяй». Эксперт пра рэзанансную заяву прадстаўніка АПК
Вільня і Варшава «ўпісаны ў каардынаты» расійскай тактычнай ядзернай зброі, але разам з тым ёсць пытанне, наколькі гэтую зброю могуць і будуць выкарыстоўваць, заявіў у каментары »Позірку» палітолаг, спецыяліст па пытаннях нацыянальнай бяспекі Аляксандр Казак.
Аляксандр Казак. Скрын відэа
Каментуючы выказванні прадстаўніка Аб'яднанага пераходнага кабінета (АПК) па абароне і нацыянальнай бяспецы Валерыя Сахашчыка, які заявіў, што Расія і Беларусь рыхтуюць планы выкарыстання ядзернай зброі і «нейкага бліцкрыгу на Вільню», эксперт адзначыў, што такія заявы маглі быць выкліканыя, «па-першае, сітуацыяй з Беларуссю, якую трэба вяртаць у інфармацыйны кантэкст і дыскурс».
«Па-другое, трэба спытаць у Сахашчыка, адкуль ён валодае такой інфармацыяй, каб зразумець, ад каго гэта зыходзіць, але не маючы на ўвазе, што ён можа хлусіць, — падкрэсліў Казак. — Зноў жа, Паўночная Карэя, мабыць, таксама будуе планы нападаў на Паўднёвую, плануе вайну з ЗША і супрацоўнічае з Расіяй. Таму абсалютна нармальна, што Беларусь і РФ маюць пэўныя планы, дзе каго атакаваць і чым бамбіць».
На думку суразмоўцы, сталіцы Літвы і Польшчы, хоць і ўпісаны ў каардынаты ТЯЗ, перадумоў яе выкарыстання «амаль няма».
«Ідзе трэці год поўнамаштабнага ўварвання ва Украіну, і, канечне, былі ідэі, але не было факта выкарыстання падобнай зброі, карысталіся нечым іншым. Ці будзе ядзерны ўдар па краінах НАТА? Я не думаю», — сказаў суразмоўца.
Па словах эксперта, у кантэксце магчымай вайны з НАТА вельмі важна карыстацца вопытам Украіны: «Мы памятаем, што была перакідка войскаў і потым адбылося ўварванне».
«Таксама быў парогавы момант адносна магчымасці вайны», — нагадаў Казак, маючы на ўвазе эвакуацыю з Украіны дыпламатаў ЗША, Расіі, іншых краін, а таксама сем'яў ваенных напярэдадні поўнамаштабнага ўварвання. «Таму нешта падобнае павінна адбывацца і ў выпадку магчымага нападу на краіны НАТА. Праціўнік вучыцца, і не варта яго недаацэньваць. Няма дэвальвацыі магчымасцяў расійскіх вайскоўцаў унутры НАТА. Лепш падрыхтаваць сваё насельніцтва, паказаць, што мы гатовы, падрыхтаваны, паспрабуйце, калі вы такія моцныя і амбіцыйныя», — падсумаваў эксперт.
Аб планах выкарыстання Расіяй і Беларуссю ядзернай зброі і падрыхтоўцы нападу на Вільню Валерый Сахашчык заявіў 24 сакавіка ў Варшаве на мітынгу з нагоды Дня Волі.
«Я гэта дакладна ведаю», — сказаў ён, дадаўшы, што «беларускія генералы са сваімі калегамі з Масквы малююць стрэлкі на картах у бок Вільнюса».
Паводле слоў Сахашчыка, улады Расіі і Беларусі спадзяюцца, што «цывілізаваны свет будзе шакіраваны» такой эскалацыяй агрэсіі і «спыніць супраціўленне».
Выкарыстанне ядзернай зброі і напад на Літву Масква і Мінск плануюць з-за няўдач у вайне з Украінай, выказаў меркаванне прадстаўнік АПК.
14 сакавіка амерыканскае выданне Foreign Policy паведаміла , што Расія перамясціла тактычную ядзерную зброю ад сваіх межаў у Беларусь, «на некалькі сотняў міль бліжэй да тэрыторыі НАТА».
Са спасылкай на «заходніх чыноўнікаў» сцвярджалася, што гэта адбылося, бо «расійскі прэзідэнт Уладзімір Пуцін пагражае шырэйшымі вайсковымі сутыкненнямі з альянсам з-за яго сталай падтрымкі Украіны».
Федэрацыя амерыканскіх навукоўцаў (FAS), спасылаючыся на ўцечку дакументаў са справаздачы ЦРУ, заявіла аб «нядаўняй мадэрнізацыі вайсковага склада ў цэнтральнай Беларусі».
Паводле інфармацыі FAS, тэрыторыя склада была аснашчана «дадатковымі перыметрамі бяспекі і пунктам доступу на яго верагоднае прызначэнне для размяшчэння расійскіх ядзерных боегаловак для пастаўленых Беларусі ракетных установак «Іскандэр».
Адзначалася, што на спадарожнікавым здымку, прадстаўленым кампаніяй Maxar Technologies, бачная частка дэпо каля Асіповічаў, якая была з таго часу таксама мадэрнізаваная і абсталяваная перыметрам бяспекі з чатырох агародж і крытай ахоўнай кропкай доступу. У абноўленым дэпо «Асіповічы» перыметр аховы павялічаны ў чатыры разы.
4 лютага начальнік узбраення Узброеных сіл Беларусі Андрэй Федзін заявіў, што размяшчэнне ў краіне расійскай тактычнай ядзернай зброі — «вельмі важкі фактар стратэгічнага стрымлівання».
Чытайце таксама:
Лукашэнка адказаў Сахашчыку: Поўная дурасць
Улады Расіі і Беларусі рыхтуюць выкарыстанне ядзернай зброі і «бліцкрыг на Вільню» — Сахашчык
Памеранскі шпіц Умка заслухаў, як беларускія генералы збіраюцца супрацьстаяць Захаду ФОТА
І ва Ўкраіне ядравы шантаж пэўны час працаваў, з-за чаго Захад вельмі асцярожна нарошчваў колькасць і наменклатуру зброі, якая прадстаўлялася Ўкраіне. У выніку пасля вызвалення Херсона з-за недахопу наступальных сродкаў ЗСУ паступова страцілі стратэгічную ініцыятыву, контрнаступ не даў істотных вынікаў, а вайна перайшла ў акопны фармат. Але гэта ўсё роўна была вельмі небяспечная сітуацыя для расейцаў, бо мясныя атакі сточваюць іхную армію, а павялічэнне міжнароднай дапамогі Ўкраіне як і раней здольнае змяніць сітуацыю.
Тады адбылася спроба Крамля падштурхнуць Іран моцна распаліць старыя канфлікты - у Палестыні і ў Емені.
Але гэтага здаецца недастаткова, і зараз Крэмль можа разглядаць ядравы шантаж, але ў гэты раз ужо з каштоўнымі для захаду закладнікамі - грамадзянамі ЕЗ. І раптоўны захоп па сутнасці памежнай Вільні і імклівае размяшчэнне там ядравай сброі за жывым шчытом з некалькіх соцен тысяч грамадзян ЕЗ моцна ўзмацняе перамоўную пазіцыю пуціна ў адносінах з захадам. Нават без ядравай атакі на НАТА.